Wèpsait nobo Korpodeko por yudabu kalkulá fiansa

WILLEMSTAD.- E Korporashon pa Desaroyo di Kòrsou (Korpodeko) a lansa su wèpsait renobá awe mèrdia. Tabata nesesario hasi adaptashonnan i presentá un wèpsait nobo ku ta brinda funshonnan nobo i asina fasilitá e proseso pa un empresario por bira kliente i asina haña un krédito pa desaroyá su empresa ku sosten di Korpodeko.

E wèpsait renobá ta kontené parti di historia di e instituto i tin dos faktor nobo i hopi interesante. Pa e kliente nobo di Korpodeko e wèpsait ta duna e opshon pa haña un kalkulo di e prima ku mester paga pa un fiansa, ora ku yena prome algun informashon básiko manera e montante ku ta deseá na fia. Djis yena e informashon aki i e sistema ta hasi e kalkulo. Di e forma ei e futuro kliente ta haña un idea global kiko lo bira su gastu di fiansa. Un di dos aspekto interesante ta ku e wèpsait nobo ta kontené un formulario di aplikashon ku e empresario por yena pa hasi su fiansa. Mesora ta haña indikashon kua ta tur e dokumentu i otro informashonnan ku mester entrega pa asina e petishon por kana su kurso.

E wèpsait nobo ta kontené un ‘blog’ tambe ku informashon riba desaroyo i tendensianan ku ta biba. Esaki ta yuda e empresario pa keda na altura di desaroyonan den mundu. E wèpsait renobá di Korpodeko ta simpel pa traha kuné, no ta nesesario pa klek hopi pa yega na e informashon deseá.

SHARE

LEAVE A REPLY