WILLEMSTAD. - Temporada di kalor a drenta. Kòrsou ta registrando kaba temperaturanan di 34ºC. Ayera tabata un dia basta kalor ku un sensashon di kayente hopi haltu.  E pronostiká di tempu pa e dianan aki ta seku leve te parsialmente nublá i wer lo keda seku i ku un temperatura máksimo ku lo alkansá 34ºC i temperatura mínimo 28ºC.

Bientu lo ta entre direkshon ost i sùitost i moderá te basta fuerte; forsa 4 te 5 (20 te 39 km/ora, 11 te 21 nudo). Ráfaga de bes en kuando te posiblemente fuerte; forsa 6 (40 te 50 km/ora, 22 te 27 nudo).

E situashon general durante di próksimo 24 ora, ta indiká ku e kondishon atmosfériko ta sigui stroba formashon di nubianan signifikante riba nos region. Pa e motibu aki, un kondishon di wer seku lo sigui prevalesé riba nos isla. Mas aleu, ta antisipá ku bientu lo ta algu ménos den transkurso di e dia di awe i esaki lo por kondusí na un sintimentu di kalor.

Kondishon di laman lo ta moderá ku altura di olanan entre 1 i 2 meter (3 i 7 pia). E olanan di mas haltu lo ta prinsipalmente riba laman habrí i den pasashi entre islanan.

Na e momentunan aki no tin ningun sistemanan signifikante di wer tropikal, tampoko fenómeno spesial.

E perspektiva te djárason atardi, ta bientu lo ta ménos fuerte ku wer seku i kalor.

Manera ta konosí dia promé di yüni temporada di orkan 2024 a kuminsá i manera ta kustumber, durante di e temporada Servisio Meteorológiko Kòrsou lo dediká atenshon spesial na disturbionan tropikal signifikante riba Osean Atlántiko tropikal i e sekshon oriental di Laman Karibe.

Si esei ta nesesario, lo emití boletin di alerta pa outoridatnan di Kòrsou i e pueblo en general. E nòmbernan ku a keda reservá pa siklonnan di e temporada ta:

Alberto, Beryl, Chris, Debby, Ernesto, Francine, Gordon, Helène, Isaac, Joyce, Kirk, Leslie, Milton, Nadine, Oscar, Patty, Raphael, Sara, Tony, Valerie i William.