WILLEMSTAD.- Wes a dikta sentensia un poko mas promé ku tempu den e kaso ku eks minister Jorge Jamaloodin a entamá, den kua el a pidi wes pa deklará e órden di su detenshon i tambe pa e keda ekstraditá nulo. Wes a kaba di dikta sentensia i den esaki a deklará ku Jamaloodin ta no atmisibel.

Den e kaso ku korte a trata siman pasá 23 ougùstùs, Jamaloodin a keda representá pa abogadonan mr. Sheldry Osepa i dr. Rutsel Martha.

Jamaloodin mes ta na Venezuela i su abogadonan a pidi e wes pa deklará e órden di su detenshon i pa e keda ekstraditá, nulo. Dr. Martha a pidi wes e dia ei pa tene kuenta ku nunka su kliente a kometé un echo kastigabel ni tampoko tin un dagvaarding den su kontra pa kasonan. Martha a pidi wes pa pone su kliente den libertat.

George “Jorge” Jamaloodin no a hui for di Kòrsou, pero tabata pa su trankilidat i tambe pa kuido di su salú ku el a biba den eksterior. Keda pendiente di mas detaye di e kaso aki.