WILLEMSTAD.- E último informashon for di sala di korte pa loke ta trata tratamentu di e kaso kontra Jorge Jamaloodin ta ku a rechasá petishon pa skòrs su detenshon. Durante di tratamentu aki Jamaloodin ta na Boneiru ainda i tur kos ta kla pa e tratamentu den kontenido dianan 10, 11 i 12 di yüni próksimo. Jamaloodin a bisa wes ku e no ta bin Kòrsou pa su tratamentu riba e dianan indiká pa evitá e show na Kòrsou di parti media. E ta haña ku ta perhudiká su famia den esaki.

Riba esaki wes a mustra e akusado ku ta hopi importante pa e tei presente na Kòrsou den sala di korte. Asta a bin dilanti ku si Jamaloodin no ke bin, lo por tres’é kontra di su boluntat. Ta p’esei ku wes ta pidié pa e bini Kòrsou di forma boluntario. Sinembargo Jamaloodin a mustra e wes ku e ta pidié pa bini, pero no ta stòp e show ku media ta harma. Riba esaki wes a kontesta ku e no tin poder pa disidí kon otronan ta traha. Loke ta sigur ta ku na momentu ku trese Jamaloodin pa tratamentu di su kaso, ku ta hasi esei bou di seguridat haltu, pero wes no por disidí kon Ministerio Públiko ta trese e akusado.

Wes a bisa Jamaloodin ku e úniko kos ku e por hasi ta di trata su kaso na un manera hustu. Na e momentu ei EXTRA por a tuma nota kon e akusado a bira hopi emoshonal. El a bisa ku e ta bin, despues di tende ku sino lo tres’é kontra di su boluntat.Pues Jorge Jamaloodin lo ta na Kòrsou dianan 10, 11 i 12 di yuni pa tratamentu di su kasonan.

‘Ja ik kom, ik kom, ik kom bij jullie” tabata su palabranan. Wes van Lieshout a splika ku ta bai trata un kaso ku a tuma lugá na Kòrsou i no na Boneiru i p’esei ta obligatorio pa Jamaloodin tei presente na Kòrsou. Mas detaye den edishon di EXTRA.