WILLEMSTAD.- “Hopi atrako ta keda kometé ku outo glas skur”, esaki ta loke ku wes a remarká den sala di korte durante tratamentu di un kaso di atrako riba un minimarket.

Un dje akusadonan a hür un vehíkulo di kual e glasnan parti patras so tabata di tènt. Den e periodo ku e tabatin e outo, el a tènt e glasnan dilanti den banda asina skur ku no por mira ken ta sintá den dje. E akusado aki a transportá tres hòmber atrakadó banda di un Supermarket p’asina nan kometé nan fechoria. E akusado a splika wes ku asina e ta hasi ora e haña outonan di hür di kual e glasnan no ta di tent. E ta tentnan, i ora di entregá e vehíkulo, e ta kita e tent nan.

Fiskal di su parti tambe a ekspresá ku ‘tentmentu’ di glas pretu ta algu fèrfelu awor. Pasobra awor aki ta tur hende por tent glas di outo ku tur konsekuensia ku esei ta trese kuné.

Den e kaso di atrako aki debí ku e glasnan tabata asina pretu di tent, polisnan no por a mira ken ta tras di stür, ora nan a mira e imágennan di kámara. Pues esaki ta un prueba ku malechornan ta hasi mal uso di e lei di glas skur pa por kometé nan aktonan kriminal.

Dia 1e di mart di 2022 a pasa e lei den parlamentu. Ta te den luna di sèptèmber di e aña ei, e lei di glas skur a bira un realidat ku su publikashon.

Na momentu ku e lei a keda aprobá, parlamentarionan a pidi komportashon i responsabilidat di parti outomobilistanan.

E kambio  di lei ta pa e dos glasnan den banda dilanti ta di tent kaminda 35% lus por pasa.

Mayoria di parlamentarionan ta haña ku e glas pretu ta pa protekshon di salú di hende.

E proposishon di lei a inisiá tempu ku sr. Humphrey Davelaar tabata den parlamentu, i despues ku e no tabata tei mas, parlamentario Gerrit Schotte (MFK) a sigui kana ku e lei aki, te ku dia 1e mart di 2022 a keda tratá.

Sr. Amerigo Thode di MFK ku ta un dje inisiadónan dje lei, a trese dilanti ku e lei no a bin pa seguridat di tráfiko. E kos primordial ta salú di hende. Pero awor tin hende ta hasi mal uso di e lei.