WILLEMSTAD. - Durante di su diskurso na okashon di instalashon di su mes persona, wes mr. Corrie ter Veer a trese un aspekto importante dilanti pa ku transparensia di proseso hurídiko pa pueblo. Wes ter Veer su punto di salida ta pa mas transparensia i publikashon di desishonnan di korte. Prosesonan di famia i di menor, mester atendé di un otro forma kisas, pero tur otro tipo di hurisdikshon, na opinion di ter Veer, mester ta transparente pa motibu ku esaki ta e úniko forma ku un komunidat por tuma nota di e imparsialidat di Korte i kere den su proseso hudisial.

Pa ilustrá dikon ta importante publisidat di hurisdikshon, wes ter Veer a mustra riba historia o sea pasado skur di no publisidat di prosesonan hudisial kaminda ku asta desishonnan ta keda tumá den sekresia i asina un hende por bai tras di trali o sali pèrdí pa semper, miéntras e ta inosente. Desafortunadamente den e tempu djawó, ainda tin paisnan ketu bai ta aplikando e práktika aki. P’esei hurisdikshon mester ta públiko, pa motibu ku di e forma aki e proseso ta kontrolabel, na opinion di ter Veer.

Tur hende mester por wak ken ta e wes i ku e ta imparsial i ta atendé e derecho di e hende segun lei. Konfiansa den wesnan ta sumamente esensial sigur pa un estado di derecho i dor di hasi esaki públiko ta kontribuí na konfiansa. Desafortunadamente, na opinion di wes ter Veer, te ainda no ta duna e prinsipio importante aki prioridat.

E wes a mustra ku na Ulanda tambe ainda tin hopi pa hasi riba e tereno aki. Tin kasonan ku ta públiko, kaminda ku tur hende ta den sala, ta bai basta bon. Pero asina e kasonan bira tratamentunan digital, ya ta limitá na e partidonan so i periodistanan i públiko no tin akseso na e tratamentu.

Pa loke ta trata e Korte di Komun di paisnan Ulandes Karibense, t’asina ku ròlnan penal i ròl sivil di djaluna ta yega serka e periodistanan, liber di kasonan di porta será. Pero ròlnan di otro hurisdikshon no ta keda mandá pa periodistanan.

Pa loke ta trata verediktonan di Kortenan den Reino Ulandes, esakinan ta keda publiká riba ‘rechtspraak.nl’, pero eseinan den mayoria kaso, ta anonimisá i ta un selekshon di 2 pa 3 porshento di tur kaso ta yega ‘rechtspraak.nl’, pues leu for di transparensia, na opinion di e periodista ulandes.

Di e forma aki nunka e periodista no por hasi su investigashon di e diferente desishonnan di korte tumá i kua ta e kompanianan ku kada bes ta faya ku lei i asta e wesnan kon nan a duna tal desishon etcetera.

Wes ter Veer a trese indiká ku tin koleganan ku tin nan reserva pa loke ta publisidat di verediktonan pa diferente motibu, pero esakinan no mester ta motibu no ta transparente.

Wes ter Veer ta di opinion ku si e aparato hudisial ke konfiansa di su komunidat, anto, korte mester ta transparente i laga e públiko kontrolá nan despues di tuma nota di nan desishon integralmente. Publisidat di verediktonan integral, por trese un sensashon di miedu  kuné, pa motibu ku esaki ta habri kaminda pa klasifiká un wes. Pero esakinan ta retonan moderno i na opinion di ter Veer, esakinan tur ta forma parti di e profeshon aki.