WILLEMSTAD.-Un ratu pasá Aubert Wiels, empleado na Marnix College a entrega keho na warda di reshèrshi kontra hende ku a bisa ku Wiels lo ta pedofil. ‘Esaki si mi no ta aseptá”, asina Aubert Wiels a bisa promé ku e drenta pa entrega keho.

EXTRA a papia di Wiels kende a bisa ku e ta haña enkargo di su hefenan. E ta konsiente ku e ta bira esun ku tur hende ta wak den su direkshon na momentu ku e kontrol preventivo ku polis a tene na e skol  a bai robes. Segun Wiels niun hende no ta wak loke a sosodé promé ku tur e kontrol i listramentu. Wiels ta papia di muchanan ku den pasado ya kaba tabatin sierto problema na skol ora ku a gara nan ku droga òf arma. E ta enfatisá ku e no ta listra niun mucha. Su ròl den e hinter e kontrol ta ku ora tin sospecho riba sierto muchanan ta bai polis pa organisá kontrol. E ta haña un lista di su superiornan di muchanan ku supuestamente por tabatin problema.

El a splika mas aleu ku awor aki tin hóbennan ku anteriormente tabata den klasnan 1 i 2 di Marnix na Rio Canario. E meta ta pa laga tur mucha komprondé ku kaso di uso i benta di droga ku a tuma lugá na Rio Canario no ta keda permití na Cas Coraweg. Wiels huntu ku direktor di e skol a palabra ku polis ku no ta saka e muchanan señalá so, pero ta saka algun mucha mas pa no pone tur atenshon riba e muchanan señalá so.

‘Tur mayor na drechi ta manda nan yu skol pa haña enseñansa pasobra na kas ta haña edukashon. Ora yega skol nan mester ta den una ambiente sigur i di protekshon pa e mucha, pa dosente i tur otro riba tereno di skol. Esei mi ta para riba dje te na morto. Na Kòrsou tin e situashon ku tin muchanan ku ta ilegal pasobra nan tin derecho di na skol pero e muchanan ei tin otro kustumber i norma.”

Wiels ta indiká ku e tin 18 aña na e skol, el a eduká hopi mucha den tur e añanan ei. Ta un mucha ku a kita for di skol a subi Facebook i yam’e pedofil i esei no ta aseptá!