WILLEMSTAD.- Ayera tabata e lastu dia di e mega tratamentu kaso Maximus Passaat i Germaniun, kaminda George Jamaloodin a keda kondená na 28 aña den korte di promé instansia.
Hof a tuma 2 siman pa trata e kaso. Esun ku mas a hala atenshon tabata kaso Maximus.
Jamaloodin a apelá su sentensia pa motibu ku semper el a insistí ku e ta inosente i no tin nada di aber ku e asesinato.
Ayera na final di e tratamentu, Jamaloodin tabatin chèns pa trese su último palabranan.
El a kuminsá asin’aki : Honorabel miembronan di korte, na promé lugá mi ke gradesí korte pa e echo ku a honra mayoria di mi deseonan di investigashon.
Mi ta spera ku korte por a tuma e echonan i a hanja un bista di e kaso.
Mi a splika korte tambe pa lesa mi dosié profundo, pa wak tur aspekto .
Awe mi ta sali ku e satisfakshon ku enberdat ta asina i mi ta gradesido na e esaki.
Esei no ta nifiká ku mi ta sali ku un kurason trankil,
no paso mi tin ku warda mi veredikto, pero pasobra tambe durante mi oudiensia mi preokupashon a oumentá miéntras ku den korte di promé instansia, ma puntra mi mes eingeijk ki mishi mi dilanti korte pa morto di sr Helmin Wiels .
Durante e kaso aki no a drenta miedu so den mi, pero tambe spantu.
Mas i mas ma skucha e testimonio di e testigunan i tambe nan argumento, ma puntra mi es kon bin ma haña mi den e situashon aki ku a wòrdu asosiá ku e morto di sr Wiels.
Mi ke ta “duideijk”, sr Wiels no a stroba ami di hasi nada, e no a stroba mi di bebe ni kome, e no a stroba mi di sali, kore paranda, e no a stroba mi bai fakansi ku mi yunan ni bai kasino.
E no a stroba mi di hasi nada. P’esei mi no ta mira e motibu pa hasi ni sr Wiels ni otro hende daño, Wiels no a hasi mi bida ménos den niun sentido.
Lógiko ku den polítika e tabata kritiká mi ministerio, pero esei tabata su manera, paso e tabatin kritiká riba su mes ministernan tambe.
Dus no ta nada straño, ta su manera di hasi polítika.
Pero remarkabel ta ku el a defendé ami i Robbie.
Dia nan a tira inval na kas di mi mama, Wiels a ataka OM. Wiels tabata bin serka mi mama i mi mama tabata stima Wiels.
Nos a lanta den bario huntu.
Awe su ruman hòmber ta aki den, ta mi amigu.
Ki mishi para aki den, Wiels ta amigu di mi ruman homber i ami amigu di su ruman.
E kos aki no tin sentido, den mi bida ma traha duru kasi tur dia 12 ora.
Mi ta hasi hopi negoshi, pero otro banda tambe mi ta gosa di bida, mi ta bai kasino mi ta kore kaya mi ta enjoy bida ku mi amigunan, henter mi famia i esei ta ami.'
Un bia mas kon mi a haña mi den e situashon aki i ta keda punta mi mes tur dia di nobo.
P’esei mi ta pidi korte pa ora ta huzga mi kaso, no lubidá ku Kòrsou ta un komunidat chikí, dus tur hende konos’é tur hende, tin bon amigu i mal amigu, pero esei no kiermen ku e aspekto di nan bida ta forma parti di mi bida.
Mi ta spera ku na momento ku korte ta evaluá e pensamentu di e kaso aki, no husga esnan ku mi konosé pero “ami”.
Mi no ta un angel ku a kai fo’i shelu, pero mi ta hasi fout i ma hasi fout.
Ma siña mi yunan semper karga e responsabilidat di loke ba hasi malu òf bon.
Mi no tin nodi ripití ku den kaso di Germanium mi ta atmití mi kulpa i mi no ta orguyoso di esaki.
Husga mi abase di mi komportashon i no abase di komportashon di otro hende. Mi ta ripití pa di mil bia p’ami ku mi no tin nada di aber ku morto di Helmin Wiels.
Mi ta gradesí mi tim di defensa, mi ta gradesí korte na nòmber di mi famia i mi abogadonan i mi ta laga mi destino den man di Dios i korte su man. Danki
Hues van Gink ku ta na kabes di e tribuna a bisa Jamaloodin ku e por tin sigur ku e sentensia pa ki ku e resultá , sa ku ta nan 3 komo hues a tuma e desishon.
Da 12 di febrüari lo sera e kaso i dia 5 di mart lo dikta sentensia.