WILLEMSTAD.- Kòrsou a drenta un fin di siman ku basta awa esei Servisio Meteorológiko ta pronostiká. Nos grandinan ta kanta ku òktober ta luna di flor i hopi awa, wèl 2020 su òktober a kuminsá for di e promé dia ku basta awa i e ta sigui, asina funshonarionan di Meteo a deklará na EXTRA.

Áwaseru a kuminsá kai for i oranan tempran den mardugá i esaki a sigui den kurso di mainta. Meteo ta mustra ku pa awe djabièrnè e wer lo keda unu bastante muha.

Pa loke ta trata mayan djasabra e chèns pa Áwaseru lo ta ménos, pero pa djadumingu si ta spera mesun situashon ku awe djabièrnè, pues djadumingu tambe lo ta un dia di basta awa. Por nota ku kontrali na djaweps e Áwaseru ta kai awe mai trankil i asina ta duna mas chèns pa drenta tera.

Meteo ta splika ku ta trata di un ‘tropical wave’ un poko aktivo ku ta pasando den nos área i esei ta trese e wer ku Áwaseru.

E sifranan ku Meteo a registrá te awor aki ta 3.8 mm di Áwaseru na Mahuma, na Zumbu 24.6 mm i e radar ta indiká ku mayoria área na Kòrsou ta hañando entre 10 – 15 mm di awa den e mainta aki. Tin áreanan sinembargo ku segun e radar ta yegando entre 15 – 20 mm di awa.