WILLEMSTAD.- Manera tabata konosí, kaso “Zonnebloem” ayera a keda tratá den korte di promé instansia. Tabata un kaso ku a trese hopi emoshon i lágrima serka e akusadonan i tambe nan famianan. Tur 4 a presentá ayera den sala di korte, pa responsabilisá nan mes pa nan aktonan.

Ministerio Públiko ta akusá Crescel Cijntje (56) i su esposa Linda Cijntje-Gout (49) ku ta direktora di Wit Gele Kruis, Ashley Isidora (55) i Charmine Ortela (46) pa falsifikashon di dokumento, malversashon di supsidio i labamentu di plaka na e instituto Wit Gele Kruis.

Sra. Cijntje-Gout i Ortela  ta keda akusá pa falsifikashon di e relatonan anual di Stichting Wit Gele Kruis di e añanan 2012, 2013 i 2014. Tambe nan ta keda akusá di a malversá 700 mil florin di kuenta di PGB (Persoons gebonden budget) den e periodo di 1e yüni 2012 te ku 31 di desèmber 2015 i no a paga e suma bèk na SVB/BZV. Pa loke ta trata e di 3 akusashon, nan ta keda akusá pa malversá 10 mil florin for di e pòt di e  personal di Wit Gele Kruis (face pot) den e periodo di 1e di yanüari 2014 te ku 31 di desèmber 2018.

Pa loke ta trata soborno, Ministerio Públiko ta akusá Cijntje-Gout i Isidora pa soborno den e periodo di 1e di yanüari 2014 te ku 31 di aprel 2015, dor di ofresé nan a akountent i òf e manager di finansa M. Shaker 250 mil florin, pa kita e suma di 700 mil florin for di e balansa di Fundashon Wit Gele Kruis.  Isidora ta  keda akusá tambe pa hasi aktividatnan bankario sin pèrmit den e mesun periodo. Segun e akusashon, e tabatin mas di 160 mil florin riba su kuenta di banko.

Crescel Cijntje (esposo di Gout-Cijntje) hefe di departamento di prima na SVB, ta keda akusá pa labamentu di plaka den e periodo di 1e di yanüari 2015 te ku e 3 di desèmber  2019. Segun e akusashon, Crescel tabatin 11 mil florin riba su kuenta ku probablemente a bin for di plaka di krímen.

Ta trata di un kaso di kual un trahadó di e instansia di Wit Gele Kruis na aña 2015, a hasi denunsia ku e pareha Cijntje-Gout lo a kometé froude ku “Jaarrekening” di aña 2014, ku ta un suma di mas di 700 mil florin. Huntu ku nan tur e otro ko-akusadonan.

Despues di 2 aña di e denunsia ku ta na aña 2017, OM a kuminsá ku un investigashon pero no a keda kla.  Dia 4 di sèptèmber 2020 polis a tene entrada hudisial na adrès di e akusadonan i a detené kada unu. Despues a laga nan den libertat  pero a bolbe detené nan dia 27 di sèptèmber i a atrobe a laga nan den libertat pendiente tratamentu di nan kaso. Na total e akusadonan a keda detené 55 dia. Cijntje-Gout a bisa ayera, ku e no por a komprondé e akusashonnan, paso semper nan kuentanan anual a keda kontrolá pa akountentnan. Segun Cijntje-Gout, el a traha 17 aña pa Wit Gele Kruis di akuerdo ku su konsenshi sin nunka kometé algu robes. Gout- Cijntje a bisa ku nan tabatin un “zorg contract”  ku tabata e karchinan di P.P. ku despues a bira un parti di AVBZ. Nan a bini ku un “persoon budget” pa baha e gastunan di AVBZ. Nan tabata intermediario entre BZV i e kliente. E aseguradonan di AVBZ mester paga esnan di kuido i tin ku deklará e kostonan ei na gobièrnu i e esun intermediario ta e Fundashon di Wit Gele Kruis.  Na desèmber 2011 e fundashon a hasi kontrakt ku Gobièrnu  ku den e kaso aki ta Stichting BZV, ku pa AVBZ “landsverordering”, ta e órgano di ehekushon fondo di AVBZ, ku for di einan e plakanan ta bin. BZV a sera un kontrato di kuido komo órgano di ehekushon, ku e Fundashon desèmber 2011/ 2012. Tambe a tuma lugá un indexering di e tarifanan.

E fundashon tabata bou di e impreshon manera palabrá 1e yanüari 2012. E pago ku a keda hasí dor di BZV, tabata na yüni 2012 numa. Fundashon a tuma nota ku gobièrnu a paga ku retro-aktivo, ku a suma 700 mil florin. Mirando ku tabata trata di mas sèn ku nan a spera, Fundashon Wit Gele Kruis a bisa SVB ku nan ta manda e sèn bèk. Pero despues e fundashon a  haña ku BZV ku a desintegrá na 2012 i SVB a bira e órgano nobo ku ta ehekutá pa e fundashon. Pero e atministrashon bieu no a pasa over pa e órgano nobo.

SVB a bisa ku e atministrashon ketu bai ta den BZV. Esei a pone ku e sèn a keda para riba kuenta di e Fundashon Wit Gele Kruis. Niun hende no a bin puntra pa e sèn i esei a pone ku Fundashon a parker e sèn riba nan ‘eigen vermogen’, en bes di a lag’é riba nan balansa. Esei tabata e palabrashon ku PWC, ku a duna e fundashon konseho pa bah’é fo’i nan balansa i pone riba e “eigen vermogen”, wardando riba e órgano nobo pa depositá e plaka bèk i no manera OM a bisa ku nan a saka e sèn  fo’i e balansa i hasié liber, segun Cijntje Goud. Ainda e sèn ta den e “eigen vermogen” i nunka a mishi ku e plaka.