Curaçao Clean Up ta den full swing ku e preparashonnan pa

WILLEMSTAD.- Curaçao Clean Up ta invitá tur habitante, skol, empresa- i organisashonnan pa partisipá na ‘World Cleanup Day’ 2025 i asina bira e Super Héroe di limpiesa.

Unesco a proklamá 20 di Sèptèmber komo dia Internashonal di Limpiesa. Pa motibu di e bon akohida di aña pasá, e aña aki atrobe Curaçao Clean Up ta organisá 2 dia di limpiesa lokal. Bou di e nòmber ‘World Clean Up Days’ Curacao. Ku esaki Kòrsou ta orguyoso di forma parti di e alrededor di 191 pais na mundu ku ta partisipá na e bunita aktividat aki. Ademas Kòrsou ta duna e akshon aki un toke speshal, ya ku nos ta hasi limpiesa den laman tambe. Diferente skol di sambuyá tur aña ta partisipá i hasi limpiesa den fondo di laman I na nos koralnan.

Teniendo kuenta ku nos solo kayente e aktividat ta start pa mas tardá 7or i ta dura te 11 or di mainta.

For di 2013, tur aña konsekutivamente míles di boluntario na Kòrsou ta partisipá na e aktividat aki. Curaçao Clean Up ta gradesido pa esaki, ademas a ripará ku komunidat poko poko pero sigur (t)a bira mas konsiente kon pa atendé ku shushi. Sigur e echo ku a kuminsá denunsiá esnan ku ta hasi nan mes kulpabel na shusha nos pais konsientemente.

E impakto positivo

Organisashon, skol i kompanianan for di aña pasá ta partisipá riba e djabièrnè durante ora di skol i trabou. Hopi ta konsiderá e dia aki komo un momentu oportuno pa traha riba nan ‘teambuilding’ ku sigur tin su balor.

Ademas di e manera aki kompanianan ta konsientisá nan empleadonan i skolnan nan alumnonan  riba e importansia di nos isla limpi. Curaçao Clean Up manera semper ta pone material disponibel manera saku grandi, hanskun i palu pa prek esaki DANKI na nos spònsernan.

Ta buska Superhéroe di Limpiesa

Curaçao Clean Up, e aña aki atrobe ta buska Super Héroenan di Limpiesa. Lo tin premionan disponibel pa tur partisipante ku destaká den e bon vibra, e energia positivo, e vestuario i e ‘before and after’ . Asin’aki Curaçao Clean Up ta agregá un toke di algun dibertishon,“fun fact” i entusiasmo na e event.

Ban Super Héroenan di nos dushi Kòrsou 

Bo por registrá komo grupo òf individual via e wèpsait di Curaçao Clean Up www.curacaocleanup.com. Bo por skohe un di e lugánan ku Curaçao Clean Up ta proponé òf bo por presentá bo mes lokashon. Kondishon ta ku e lokashon mester ta un tereno públiko i no mester ta trata di shushi bio-degradabel.

Inskripshon ta habrí

Inskripshon ta habri for di djaluna 18 di ougùstùs te ku 10 di Sèptèmber, kual ta 1 siman promé ku e evento. Ta rekomendá pa registrá na tempu pa bo por skohe e lugá di bo preferensia. Curaçao Clean Up ta apresiá tur koperashon na World Clean Up Day 2025, paso esaki ta nos lucha pa un Kòrsou mas limpi.

Super Héroenan di limpiesa, aktivá! Registrá i ban mustra mundu henter kon nos ta limpia nos Kòrsou.

Pa mas informashon tokante inskripshon via wèpsait por yama e number di telefòn : 5266396.