WILLEMSTAD,- Empresario Gilbert Ricardo awe mainta a manda un karta na media di komunikashon tokante entrada hudisial ku a tuma lugá den su kas ayera mainta. E entrada tabata parti di un investigashon di Ministerio Públiko tokante un kaso di soborno di un parlamentario i tambe un kaso di posibel soborno di parlamentario Yaël Plet. Plet dia 18 di febrüari e aña aki a entrega un keho na Ministerio Públiko. Segun Plet a ofresé su persona sèn pa e ta kibra ku frakshon di partido MAN i bira parlamentario independiente, pa asina kibra gobièrnu di Hensley Koeiman.

Ayera Ministerio Publiko a splika ku parlamentario Gerrit Schotte i polítiko Charles Cooper ta sospechoso den e kaso. Tabatin entrada hudisial den nan kas i tambe den kas di Ricardo. Awe mainta Ricardo a duna di konosé ku e tin prueba ku: ‘niun momentu so mi a papia òf ofresé Yaël Plet ningun oferta pa sostené otro Gobièrnu òf haña fabor pa kambio di pago.’

Gilbert Ricardo: ‘Mi ta hopi kibra pa tur e notisianan ku a sali, pa motibu ku e tipo di aktonan ei, no ta parti di mi personalidat.’ Tambe ela bisa ku e no ta deskartá pasonan hurídiko.

Den e karta ta skirbi ku ‘Yaël Plet ta deklará ku Sr. Ricardo nunka a ofresé òf papia ku mi lo e siguiente:

A.Na momentu di bai bira òf bira miembro di parlamento di Kòrsou pa partido MAN, pa bòltu i bai sostené otro bloke di Gobièrnu.

B.Nunka a papia ku mi pa ningun proposishon pa hasi deal pa bai ku asiento di partido MAN òf kontra pago.

C.Sr. Ricardo hamas a ofresé mi sèn pa deal nada den Gobièrnu i tampoko pa bai ku asiento pa forma otro Gobièrnu.’

Abou di e karta Plet a skirbi: ‘Esaki ta promé ku 9 di feb i 18 feb 2017 nunka Gibi (Ricardo) a yega serka mi ku un proposishon asina.’

E karta a wòrdu firma den duplo. Ricardo a manda un kopia di e karta  keda na prensa.