WILLEMSTAD - S.M. Groningen a bolbe frustra dos trafikashon di droga den Region Karibe. Ta trata di e di 4 i di 5 botin den un luna.  Djasabra pasá e  barku di Marina a interseptá kasi 284 kilo di droga i djaluna 1.720 kilo di kokaina i 29 kilo di kristal di metanfetamina. 

Kuantu berdaderamente a keda kitá for di riba merkado, no por bisá ku siguridat. Fin di siman pasa durante e kaptura, e sospechosonan a logra tira tur kos for di bordo den laman, promé ku por a para e boto. Sigur 284 kilo a keda saka for di den laman.

E presunto kontrabandistanan a ‘dump’ e karga di nan ‘go-fast’ na momentu ku nan a mira un helikòpter di e barku di Marina Ingles RFA Argus. Despues nan a baha na katuna, pero nan a ser persiguí pa 2 FRISC. E botonan di intersepshon rápido aki a keda desplegá pa Groningen.

Ademas di e kargamentu ku a keda saká for di den laman, no a haña droga na bordo. E 3 sospechosonan a keda transferí na Wardakosta Merikano.

Dòbel gòlpi

Djaluna atrobe tabata un gòlpi. Huntu ku RFA Argus i su helikòpternan, e barku di patruya di Marina, un biaha mas a obligá un ‘go-fast’ pa stòp.

Tambe e biaha aki e FRISC nan di Groningen a persiguí e sospechosonan. Den e boto di droga a enkontrá vários bulto di kontrabanda. Den e intersepshon aki e kokaina i e kristal di metanfetamina a wòrdu konfiská.

S.M. Groningen for yüli 2020 ta e barku ku ta patruya aktivamente den Region Karibe. E barku ta kombiná operashonnan kontra trafikashon di droga ku sosten na Wardakosta di Region Karibe. E luna aki Groningen a sa huntu ku partnernan Internashonal di konfiská no ménos ku 3 tòn di kokaina.