WILLEMSTAD.- Kuerpo Polisial ta hasi yamada pa por solisitá riba vakaturanan habrí. Di akuerdo ku hefe di prosesonan interno sr. Elbert Sambo a trese dilanti ku mishon di Kuerpo Polisial ta sirbi i protehá. Pa por hasi esaki mester ta un organisashon adekuá i konfiabel pa por duna e servisio i kumpli ku nan mishon. Den e kuadro ei ku minister a yega na un Plan di Reklutashon pa e añanan ku ta bini pa yega na yena vakaturanan den Kuerpo Polisial poko poko i poulatinamente segun skema ku tin p’esei.

Den e kuadro aki den fin di aña a habri vakatura pa por tin e personal adekuá komprometé i konfiabel i por duna e servisio pa por sirbi i protehá. A habri vakatura pa agente aspirante kual ta e funshon kaminda hende ta interesá pa bira polis i ehekutá e tareanan polisial. Tin rekisito ku mester kumpli kuné den tur e funshonnan i esaki ta un liña kòrá ku mester kumpli kuné. E vakatura pa aspirante ta unu klave pa yega na agente polisial. Esnan ku ta interesá mester tene kuenta ku ta un trabou di sakrifisio. Kaminda ta spera ku den próksimo añanan ta bai ehekutá nan trabou riba kaya i e trabou aki ta unu di 24 ora. Tur hende ku ta sinti ku nan ke aportá na nan pais, ta keda invitá pa solisitá si nan ta kumpli ku rekisitonan. Tambe tin funshon di imigrashon, regisor di bario, lider di Tim di Imigrashon, hefe di unidat di tráfiko, hefe di unidat di “intake & service”. E vakaturanan aki ta konta pa hendenan di den kuerpo polisial mes òf kadena hudisial ku ta deseá na yena e funshonnan aki tambe por solisitá.

Mas aleu sr. Sambo a bisa ku tin vakatura den e áreanan di sosten ku tin di sòru pa e polis duna servisio afó, kual ta mekániko, hefe di departamento di finansa i hefe di unidat fasilitario.

Tur e vakaturanan aki tin rekisitonan hopi amplio. P’esei por subi riba wèpsait www.polis.cw/vakatura òf www.gobiernu.cw, òf Facebook: Korps Politie Curaçao òf Instagram: korpspolitie 2021.

Dor ku Kuerpo Polisial ta digitalisando, e solisitut tambe ta digital. Pa kada funshon tin formulario digital pa por solisitá, sr. Sambo a terminá bisando.