Djaweps i djabièrnè na base di marina na Parera

WILLEMSTAD.-E pandemia di Covid realmente ta kousando situashonnan hopi difísil den e komunidat aki. Sindikato SGTK ta sigui lucha pa bienestar di su miembronan i hinter pais a tene reunion ku Refineria di Kòrsou i tambe ku kontratistanan pasobra Covid tin su efekto riba e trahadónan. Den kombersashon ku dirigente sindikal Alcides Cova el a indiká ku tin hende ku a bira hopi malu i ta interná den hospital miéntras ku tin hende ku a pèrdè nan bida kaba na Covid.

Tin diferente hende riba tereno di refineria ku a keda infektá kaba. Ta trata di tantu trahadónan di Isla, ku awor aki ta kai bou di RdK komo trahadónan di kontratista. SGTK a bisa ku a hasi trámitenan i a haña outoridatnan kompetente pa organisá di tal forma ku por bakuna tur e trahadónan.

Mayan djaweps i djabièrnè e yamada urgente ta bai na tur trahadó di Isla, kontratistanan i nan famia pa mèldu na base di marina na Parera pa haña e bakuna. Mester hasi e esfuerso aki pasobra si resultá ku un hende den un warda ta infektá esei ta nifiká ku mester manda tur hende kas i esei ta funesto pa e operashon.

Na opinion di Alcides Cova, ta importante pa trahadónan ta bon protehá miéntras ku negosiashonnan final ta tumando lugá pa loke ta trata operashon i maneho di e refineria. Una bes ku ta kla pa ranka sali tur trahadó mester ta bon di salú. Un yamada ta bai na esnan di Damen tambe pa registrá.