WILLEMSTAD.- Por kuminsá mira pasonan konkreto di parti di gobièrnu pa yega na un penshon privá di karakter obligatorio. Esei pa nos poblashon por tin un entrada mas desente ku no ta solamente e penshun di behes di SB (AOV). I tur esaki ta poné kaba den un proyekto di lei.

E proyekto di lei ta introdusí bisando entre otro ku, den di Areglo di Estado ta ser menshoná ku gobièrnu di pais mester sòru pa un sistema ku ta duna habitantenan di Kòrsou akseso na e kuido nesesario i di bon kalidat sosial. E bienestar di hende grandinan den pais Kòrsou ta konektá na esaki sin mas. E Ministerio di Desaroyo Sosial, Labor i Bienestar ta atendé tur loke ta e entrada, e gastunan pa mantenshon i e situashon di bida di penshonadonan denter di e Maneho pa Grandinan 2020-2030 di un forma integral.

A base di datonan demográfiko di CBS, e embehesimentu i huntu kuné e défisitnan di e fondo di AOV lo subi di tal manera den e próksimo 30 aña ku lo bira nesesario pa tuma medidanan drástiko pa por mantené e provishon aki, esta e fondo di AOV. Dor di esaki na 2012 a dal e promé pasonan pa hisa e edat di penshun na 65 aña.

Tin un 50 porshento di e forsa laboral aktual den komunidat ku no tin un di dos penshun, i esaki sigur ta konta pa esnan den sektornan manera horeka i distribushon. Nos a papia aki di kasi un 30.000 hende ku na momentu ku nan yega edat di penshun lo no tin otro provishon sino solamente e AOV.

Pero den e mesun aña 2012 Konseho di Minister a disidí di adoptá e rekomendashonnan den kaso di saniamentu di e fondo di AOV i pa banda di esaki presentá proposishonnan konkreto pa yega na un di dos penshun, ku a ser yamá Penshun Básiko Obligatorio.

Akuerdo di Penshun:

Den kuadro di ehekushon di e lei aki lo sera akuerdo di penshun entre e partisipante i e kompania ku ta manehá i ehekutá esaki. E akuerdo di penshun aki ta enserá un seguro pa akumulashon di un kapital durante e periodo aktivo dje partisipante te na momentu ku e yega su penshun i ta intenshoná pa kompra di un seguro riba e fecha di penshun.

Un akuerdo di penshun en todo kaso ta sigurá e kapital ku ta un totalidat di e primanan neto, huntu ku e interes ku ta bini aserka. E interes akumulá ta resultado di invershonnan hasí dor di e kompania. E partisipante, komo esun ku ta karga riesgo, tin influensia riba e manera kon su kapital ta ser invertí.

E kapital di penshun te ku e momentu ku a alkansá e edat di penshun lo no por ser kumprá, kambiá, ni konfiská dor di tersera i tampoko e por ser envolví den bankarota di un partisipante.