DEN HAAG/W’STAD.- Un lèk ku a surgi serka un kompania di tèst (laboratorio) a pone ku tur hende na Hulanda ku tabata deseá lo por a haña un prueba falsifiká pa por a biaha. Esaki lo a bira posibel den e app CoronaCheck. Aparte di esei tin datonan privá di no ménos ku 60.000 persona ku a hasi tèst na e kompania aki ku tambe a lèk. Esaki t algu ku a sali na kla for di un investigashon hasí dor di RTL na Hulanda.

E lèk a sinta serka Testcoronanu, ku ta un kompania di tèst ku tin dies filial na Hulanda i tres na Bèlgika i ku tin konekshon ku e inisiativa Testenvoorjereis.nl. E kompania aki no solamente tabata ser rekomendá dor di gobièrnu pa bo bai tèst, pro tambe tabata ser supsidiá ku plakanan di belasting Hulandes.

Dor di e lèk tur hende por a bai hasi kaweta den e banko di data di e kompania di tèst aki, i di un forma masha simpel yena un tèst negativo. Bo mes por a yena e datonan korekto i seguidamente risibí un prueba di e CoronaCheck válido i sin bo mester a bai vakuná. Tur esaki ta algu ku a sosodé den e fin di siman ku a pasa.

E ministerio di salubridat, bienestar i deporte despues di a notisia aki a disidí di kita e kompania for di su sistemanan, i komo tal lo no por entregá ni tèst ni pruebanan di akseso mas. Ademas anan mester a stòp di tèst mesora ya ku e datonan personal ni ta sigur.

Segun ekspertonan, pruebanan falsu di Corona ta n peliger pa salubridat i funesto pa e konfiansa den Coronacheck.

De e base di data dje kompania bo mes por a yena ki tipo di test bo ke, manera p.e. antigeno of PCR, tambe ki momentu esaki a ser hasí i kiko te resultado. Outomátikamente tambe bo ta risibí un sertifikado di biahe di Testcoronanu i riba dje tin firma di un dòkter ku ta indiká ku bo a tèst negativo. E datonan ku ta ser kontrolá huntu ku e prueba, manera bo nòmber kompleto, fecha di nasementu, bo por a yena manera bo ke, sea pa bo mes òf otro hende. Tabata posibel tambe pa adaptá datonan di otro hende, manera p.e. kambia un tèst positivo den negativo.