DUO ta evaluá bo espasio pa paga bek a base di informashon di impuesto di Kòrsou

WILLEMSTAD.- Tin demasiado di nos eks studiantenan ku no ke tuma e ‘molèster’ ku alabes ta un obligashon, di yena nan papelnan di belasting tur aña I entrega esei na inspekshon di impuesto na Kòrsou. Esei por skapa gran mayoria di problemanan ku nos eks studiantenan ta konfrontando awendia ku Dienst Uitvoering Onderwijs (DUO). Esei ta e reakshon di Marilyn Alcala-Walle, minister di Enseñansa i su kolaboradó ku tin tarea speshal pa atendé problemanan ku eks studiantenan ta topa ku pago bek di nan debe di estudio.

EXTRA a informá anteriormente di e grupo di eks studiante, ku na kabes Richinel i Jerry, kendenan a splika ku nan ta sinti ku DUO ta ‘horka’ nan ku pago di debe di estudio. Parse tin vários eks studiante mas den mesun problema pero hopi no tin e kurashi pa splika públikamente kiko ta nan problema. Segun deklarashon di e eks studiantenan aki, e problema ta ku DUO no ta tene kuenta ku ‘draagkrachtmeting’ ku otro palabra e organisashon ulandes no ta tene kuenta ku pago di hipotek, fiansa di outo i otro gastunan importante i nesesario pa un hende por sobrebibí i move na Kòrsou.

Den kombersashon ku minister Alcala-Walle i su kolaboradó nan a mustra komprenshon pa e problema ku eks studiantenan ta trese dilanti, mas ainda pa motibu ku den tempu ku e no tabata minister e fundashon Marilyn Alcala-Walle tabata dediká hopi atenshon na e tipo di problema aki. Asta a logra ku DUO ta bini Kòrsou dos bia pa aña pa duna informashon i asina tene tur studiante i eks studiante na altura di desaroyonan. Ta tene seshonnan di informashon hustamente pa tene studiante i eks studiantenan na altura di tur loke ta importante i asina evitá problema. A logra tambe ku por hasi pago na florin, pero kòrda bon ku mester anunsiá esei un aña delantá na DUO ku e eks studiante ta ba paga na florin riba e kuenta di DUO na Kòrsou. Tene kuenta ku e pagamentu na florin ta parti di un proyekto piloto pasobra DUO a indiká bon kla ku NO ta kumbiní nan pa laga eks studiantenan paga na florin debí ku e gastunan di banko na Kòrsou ta hopi haltu. Pues lo bai evaluá si ta kontinuá ku e posibilidat di laga eks studiantenan paga na florin.

‘Si un eks studiante no yena su impuesto di entrada i entrega esaki na tempu na belasting di Kòrsou esei ta pone ku DUO ta bai wak kiko e hende debe i ta parti esei den 15 aña. Den kaso ku e eks studiante tuma esun tiki ‘molèster’ di yena su informashon korekto i detayá pa belasting na Kòrsou mesora DUO ta haña e informashon korekto i por hasi un mihó kalkulashon”.

Segun minister Alcala-Walle, e problema grandi ku hopi eks studiante ta konfrontando por keda aliviá hopi fásil si solamente yena papelnan di impuesto di entrada na Kòrsou i entrega esaki na tempu na servisio di belasting.