WILLEMSTAD.- Korte di promé instansia a trata kaso ayera di un yu ku a menasá su mama i su tanta ku morto via e sistema di “ WhatsApp”.
Ta trata di e akusado Carlton Stroop ku ta keda akusá ku dia 6 i 7 di febrüari a manda un app pa su tanta eksigiendo pa manda sèn pe òf e lo mat’é.
Segun hues ora ku e akusado a keda arestá, el a deklará na polis ku su mama i tanchi ta di "clone" i ku nan mester wòrdu matá.
E akusado ta konosí pa su problemanan sikiátriko i a wòrdu rechasá vários bia pa Klínika Capriles pa su komportashon.
Na polis el a deklará ku e ke mira su mama morto.
E akusado ku aworakí ta enkarselá den Foba, a presentá den sala di korte i tabata wòrdu vigilá ku wowonan di falki pa e miembro nan di Lbd.
Segun akusado el a manda e app dor di rabia.
El a bisa ku nan ta konsider’é komo loko, pero ku esaki no ta e kaso.
Segun e akusado nan a bai duna keho riba dje, ku e ta kana sunú den Foba pero ku esaki no ta bèrdat.
El a bisa ku dor ku su kueru ta seku ora e kaba di baña, e ta laga su kurpa seka un ratu promé pa despues e hunta krema i bisti paña.
Hues mas aleu a sigui duna di konosé ku akusado fo’i aña 2015, tin problema ku su famia di kual na vários okashon a menasá nan.
Na Ulanda tambe el a menasá su rumannan ku morto i a bai nan kas i kibra vários kos.
Korte di Ulanda a bisa den su veredikto, ku akusado mester wòrdu interná den un klínika sikiátriko inmediatamente.
Akusado a bin Kòrsou i nada di esaki no a tuma lugá.
E akusado ayera a splika korte ku e tin problema ku su "kakumbein" i no ta hañando tratamentu pe den prizòn.
El a splika ku ora e hap, e kakumbein ta pega i no por grita e bewakernan pa yud’é.
Segun akusado niun bewaker no kier skuch’é ni no ta hañando tratamentu médiko.
Fiskal Lasten ku a hiba e akusashonnan, a duna di konosé ku na yanüari último akusado a keda detené pa motibu ku el a menasá su mama ku morto.
Fiskal a sigui relatá ku e akusado ta un adikto na droga i por bira hopi agresivo.
Fiskal a bisa mas aleu ku en bèrdat Ulanda a traha un rapòrt i bisa ku akusado tin problema ku su " kakumbein".
Nan a papia esaki ku prizòn pa e bishitá un siruhano, pero e spesialista a bisa ku e no ke detenido na su ofisina, pa seguridat di otro pashèntnan.
Segun fiskal mas aleu, dòkter Heitel, a duna di konosé ku e problema di e akusado, ta mas serio ku e asuntu di droga. Segun e spesialista ora ku e akusado tuma su remedi, nan por komuniká kuné mas mihó. Pero ora esaki no ta e kaso, e ta bira peligroso pa otronan den su serkania.
Mirando tur esakinan fiskal a bisa ku mester bin un solushon promé ku manda e akusado kas.
Fiskal ta yega na e demanda di un aña den un instituto sikiátriko.
Abogado Dickens a duna di konos’é ku e tambe tabatin mes un pensamentu ku fiskal i ta bai kompletamente di akuerdo ku e demanda.
Hues de Kort a bisa ku en bèrdat mester buska un solushon pa ku e akusado i a honra e petishon pa e akusado keda interná inmediatamente den un departamento spesial sikiátriko di Klínika Capriles.