Uso di kokaina motibu di hopi problema mental

WILLEMSTAD. - Un hòmber yu di Kòrsou di 57 aña di edat a keda kondená den korte na Den Haag, pa motibu ku el a hinka su víktima un señora ku kuchu vários biaha pa e trata di bai ku su tas. Dos siman despues e ta intentá di drenta den kas di hende den oranan di anochi, momentu ku e famia tabata den nan trankilidat.

For di e veredikto por saka afó ku for di aña 2004 ku e hòmber a emigrá pa Hulanda for di Kòrsou, el a kuminsá kai será i kondená pa echonan kastigabel. Di e forma aki el a keda kondená na aña 2009 i na 2013 tambe, miéntras den e último 5 añanan el a keda kondená na dos okashon mas. Pues e echonan kastigabel ku el a kometé awor aki ta den su periodo di prueba.

E hòmber aki su problemanan ta serio i hopi. Rapòrtnan di e diferente profeshonalnan riba tereno mental ta mustra ku e problemanan mental ta múltiple. Riba kasi tur tereno e hòmber aki tin problema. Situashon instabil den mayoria di e kasonan aki, esta ora ku e yu di Kòrsou biaha pa Hulanda, no tin kas, no ta keda kla ku trabou ta hinka nan den e situashon ariba menshoná.

Un di e motibunan mas ku e ta den se situashon mental aki, ta e echo ku e ta un gran usadó di kokaina. Esaki ta hink’e den un  situashon sikótiko, skisofrenia serio.

P’esei e konsehonan pa e akusado haña tratamentu pa su kondishon mental ta altamente rekomendabel.

Pero e loke ku Korte ta tuma e hòmber aki na malu ta ku e ta buska kada bes e hendenan muhé pa atraká i e ta mira nan komo blankonan fásil pa e atraká.

Den e kaso spesífiko, el a ranka un tas for di e señora, pero ora ku e señora no a laga bai, el a saka un kuchú i kuminsá hinka e señora na su skouder ariba su garganta, su brasa etcetera.

Fiskal ta kere ku e akusado tin di bai será 4 aña di kua 6 luna kondishonal i un periodo di prueba di 5 aña i esaki mará na tratamentu mental bou di guia di reclassering.

Korte ta yega na prueba di intento di asesinato i intento di ladronisia  i esaki Korte a yega na un kondena di 36 luna di kua 12 luna kondishonal  i un periodo di prueba di 5 aña.

Korte a imponé tambe un daño i perhuisio di 6.820 euro.