AMSTERDAM.- E hòmber yu di Kòrsou Randall D. ku e aña aki a keda detené na Kòrsou pa kaso di asesinato na Hulanda, djamars 19 di òktober a haña otro ‘dagvaarding’ pa otro kaso di asesinato na Hulanda.

E hòmber di 40 aña e aña aki a keda detené na Kòrsou i e tabata skondí pa outoridatnan di Hulanda. Outoridatnan hudisial a presentá ku e di dos ‘dagvaarding’ pe den su sel komo responsabel pa morto di un hòmber di fam Lucas Boom, segun medionan hulandes ta indiká.

Anteriormente den 2015 tambe Randall a keda detené pa morto di Boom, pero korte a lag’e den libertat.

Randall tin un kaso di asesinato kaba riba su nòmber kontra di un stazjèr ku inosentemente a pèrdè su bida na su man den yanüari 2018 den sentro di bario di Amsterdam. Pa morto di e stazjèr aki mes el a keda detené na Kòrsou. Asesinato di e stazjèr a tuma lugá banda di un skol básiko, kaminda hopi mucha tabata testigu di loke a pasa.

E echo ku tabata falta di prueba den e kaso di Boom, a lag’e bai. Pero parse ku awor lo tin deklarashon di testigunan anónimo den su kontra.