ROTTERDAM – Awe den oranan di mainta tempran despues di un asina yama ‘fiesta antiano’ a surgi un diskushon ku a bin finalisá den un kaso serio di hinkamentu. Polis di Rotterdam ta informá den nan boletin ofisial ku a detené dos persona for di Den Haag i Rotterdam. E duo di 22 i 18 aña lo ta enbolbí den e kaso di bringamentu aki. Durante e bringamentu aki, un hóben yu di Kòrsou di 23 aña di edat a risibí algun hinka serio. Kámaranan di polis a tuma nota banda di 5:30 am di e bringamentu formal aki den sentro di suidat di Rotterdam. Dos polis kier a intervení pero un di nan mes a risibí sla. Ku yudansa di e pòrtirnan i mas polis ku a yega na e sitio por a detené e dos sospechosonan.
Ta mas despues a drenta e informashon ku lo tin un víktima di hinkamentu. Polis ta sospecha ku esaki lo a tuma lugá durante e bringamentu. E hóben yu di Kòrsou a keda seriamente hinka i mesora a keda transportá pa hospital. Su situashon ta stabil awor. Polis ta kere ku e víktima mes lo a kana bai na e sentral di taksi unda el a sak den otro i kai abou. Ku urgensia ku vários hinká na su barika el a keda transportá pa hospital. E investigashon ta andando di parti di Kuerpo Polisial di Rotterdam.