WILLEMSTAD.- Famia i outoridatnan na Merka a emití búskeda di un hòmber yu di Kòrsou ku awe a kumpli un siman di su desaparishon na Miami, Florida.
For di e informashonnan ku a keda publiká riba retnan sosial, i tambe e página ofisial di Interpol, e hòmber aki lo ta pèrdí for di dia 22 di òktober.
Ultimo kaminda ku a señalá e hòmber, Dwayne Clement Fluonia tabata na Clarion Hotel kual ta kaminda ku e lo mester tabata hospedá huntu ku un grupo di amigu ku el a realisá e biahe kuné. Parse ku e amigunan a lanta mainta i no a topa ku Dwayne.
Dwayne lo mester ta un persona ku problemanan mental i ta bebe remedi riba un base regular. Pero ya e grupo di amigu entre tantu a regresá Kòrsou i sin sa paradero di e hòmber yu’i Kòrsou aki.
Famianan a indiká na EXTRA ku nan ta apstené di duna deklarashon na prensa, pero ya e informashon a keda publiká riba retnan sosial i e página ofisial di Interpol.
EXTRA a aserka outoridatnan lokal riba e persona pèrdí na Merka, pero bosero polisial di Kòrsou a indiká di no sa nada dje informashon ku tin un kurasoleño pèrdí na Merka.