El a bai yuda persiguí grupo ku a atraká amigu

WILLEMSTAD/ROTTERDAM.- Djaluna dia 11 di òktober último, un hòmber oriundo yu’i Kòrsou, a keda likidá den e siudat di Rotterdam na Bloemhof. Ta trata di Roncherello Ellis di apénas 20 aña, ku tabata biba den Rotterdam. Tabata entre 10 or pa mitar di 11 di anochi, ora ku un grupo di hòmber a keda atraká pa un otro grupo den Putsebocht na Rotterdam-Bloemhof. Un di e personanan den e grupo, a atraká e grupo ku e víktima tabata pertenesé na dje, despues ku el a kaba di saka sèn for di bankomátiko. Despues di e robo, e atrakador i e grupo a kore bai den un vehíkulo. Esun ku a saka plaka for di e mashin huntu ku e víktima Ellis i algun persona mas, a drenta den un Volkswagen kolo kòrá, lagando e BMW di e víktima atras, pa persiguí e atrakador i su grupo. E persekushon a terminá den Schiltmanstraat, kaminda e grupo di atrakador a basha bala riba e Volkswagen ku e víktima tabata sintá aden. Roncherello a keda heridá gravemente i mes ora a keda trasladá pa su amigunan pa hospital Ikazia. Na su yegada e personal di e hospital, no por a hasi nada mas pa e víktima. E tim di investigashon, a pone 20 reshèrshi pa atendé e kaso. Nan a pidi pa tur esnan ku por a mira òf tende algu pa duna informashon. Tambe nan por yama anónimo pa asina por yega na detenshon di e malechornan. Polis a bisa ku nan lo bai hasi uzo di imágennan de kámara i tur evidensia ku por yuda solushoná e kaso.

...Polis hasiendo investigashon na e vehíkulo ku a haña un kantidat di bala i kaba ku bida di Ellis....