...Riba foto por mira e personal di ambulans for di Hulanda ku ta laborando ku koleganan na Kòrsou. FB FKAK...

WILLEMSTAD.- Fundashon Kuido di Ambulans Kòrsou tambe a risibí yudansa di enfermero spesialisá di ambulans for di Hulanda pa yuda e organisashon.
EXTRA a papia ku presidente di e Hunta di Komisario dr. Rob Spong kende a indiká ku en bèrdat servisio di ambulans a haña 6 personal for di Hulanda den siman ku ta kabando. Ya nan ta funshoná riba ambulans.
E personal lo keda pa 4 siman na Kòrsou.
Mester a buska refuerso for di Hulanda debí na e preshon enorme ku tin riba e personal. Manera ta konosí debí na e oumento di kasonan di Corona vírus riba nos isla, ambulans tabatin man yen pa buska hendenan ku bira malu na kas hiba hospital. Esaki banda di e trabounan diario ku nan mester atendé kuné.
Banda di esaki algun trahadó tambe a keda afektá ku e vírus aki, kual a pone mas peso riba e trabou.
EXTRA a papia ku minister di salubridat sra. Zita Jesus-Leito kende a indiká ku aparte ku a buska personal médiko for di Hulanda pa yuda den CMC, a buska personal tambe pa yuda vakuná i pa ambulans.