Yudansa pa kobradónan ònderstant awe

Minister presidènt: No ta loke nos a pidi pero e ta yuda e situashon

WILLEMSTAD.- Minister presidènt Eugene Rhuggenaath a splika awe, durante di e konferensha di prensa riba Covid-19, ku e yudansa finansiero ku a pidi na Reino tabata yudansa finansiero pero den forma di un regalo. Naturalmente ku gobièrnu di Kòrsou ta konsiente di su propio responsabilidat pero un fiansa pa atendé ku Covid-19 lo nifiká un peso mas grandi riba e presupuesto di pais ku ya kaba ta bou di hopi preshon. Di e 765 mion florin ku Kòrsou a pidi pa tres luna, Ulanda a bai di akuerdo ku un fiansa na rason di 177 mion pa seis siman. Di otro banda minister di hustisia Quincy Girigorie a informá na nòmber di su kolega di Desaroyo Sosial ku awe ta kuminsá duna yudansa na kobradónan di ònderstant.

Awe Konseho di Minister di Reino a trata e petishon ku e paisnan Kòrsou, Aruba i Sint Maarten a hasi. Hopi kla a sali dilanti ku e pakete sosial pa e grupo di hendenan ku ta traha riba nan mes, kobradónan di ònderstant i algun mas Kòrsou mester krea espasio den su propio presupuesto pa kubri eseinan. CFT tambe a rekomendá pa Kòrsou mes buska espasio pa yuda esnan den nesesidat.

Pa loke ta trata e suma di e fiansa ku Ulanda ta pone disponibel minister presidènt ta bisa ku e no ta sufisiente pero laga nos mira e yudansa aki komo parti di un trayekto nobo ku mester kuminsá. E echo ku ta bai fia kantidat grandi di sèn, ta nifiká ku mester wak kon pa paga bèk. P’esei a mustra den karta na Ulanda ku si e yudansa ta bini den forma di un fiansa e por tin konsekuensia pa presupuesto den futuro. Importante pa kada hende e komunidat aki realisá ku kosnan ku no tabata posibel mester bira posibel kuminsando awe. Redukshon di gastunan di kompanianan i fundashonnan di gobièrnu inkluso salarionan i meskos mester atendé ku e gastunan den e aparato públiko.

Minister Girigorie ta satisfecho ku nos poblashon pa gran parti ta tene nan mes na reglanan pa keda kas, ounke den dianan tras di lomba si esei a kuminsá demostrá un komportashon ménos bon. El a kòrda tur hende ku ta na momentu ku komunidat sigui mantené reglanan por kuminsá pensa pa suavisá e reglanan.

Tambe el a duna informashon ku awe ta kuminsá duna yudansa na kobradónan di ònderstant. Mas detaye den edishon di EXTRA.

SHARE

LEAVE A REPLY