WILLEMSTAD.- Pa di kuater biaha den dos luna di tempu e Barku di Marina Hulandes  Zr.Ms. Groningen a interseptá un kantidat grandi di transporte di droga.

Den mardugá di dia 2 di desèmber, e barku di patruya den Karibe a sa di obligá un asina yamá ‘go-fast’  pa stòp; e boto aki tabata transportando un kargamentu di kokaina di mas di 1400 kilo.

E  Dash-8 den e área, un avion marítimo di patruya di Wardakosta di Region Karibe, a deskubrí e boto di droga rápido aki. Zr.Ms. Groningen a keda aktivá pa esaki, ku na su turno a aktivá su helikòpter di kombate marítimo NH90. Miéntras tantu Groningen a lansa un FRISC, un di e dos botonan rápido pa intersepshon, ku ta ubiká riba Groningen. E ‘go-fast’ a keda al final obligá di stòp, pa medio di intermediashon di e helikòpter NH-90.

E  FRISC, ku tabatin a bordo un tim kombiná di Wardakosta merikano i Kuerpo di Marina, tabata rápidamente na e lugá despues pa listra e boto ku tabata transportando droga. Den esaki a enkontrá 1421 kilo di kokaina. E sospechosonan i e droga mas despues a keda entregá na un barku di Wardakosta merikano, pa persekushon tuma lugá na Estádos Unídos di Merka.

For di aprel di 2019 Zr.Ms. Groningen, komo barku di patruya den region Karibe, ta aktivo den e área aki. Groningen ta forma parti di e ‘Tripulashon alternativo riba Barku di Patruya ku ta subi Oséano (pilot Ocean Going Patrolvessel).

Esaki ta nifiká ku e barku ta nabegá dos aña largu den área Karibe, pero ku e tripulashon ta kambia periódikamente. Ehersé operashonnan kontra droga i sostené Wardakosta Karibe ta tareanan di e barku di patruya. E tripulashon aktual desde su rotashon na sèptèmber último, ya dos biaha promé ku e último aki a hasi un detekshon di droga. Pues te ku awor e rotashon aki a sa di kita 2900 kilo for di riba kaya.