WILLEMSTAD.- Ta basta shushi Kunuku Man i su tim di boluntarionan a rekohé kantu di kaminda na Boka Samí. Anto esei ta kantu di kaminda so, ku a totalisá 355 kilo. Lo tin hopi tonelada mas meimei dje bario, kual ta un situashon di tristesa. Den e fin siman ku a pasa e grupo di boluntario aki ku ta sakrifiká parti di nan djadumingu pa piki shushi ku otronan ta tira riba kaya, a bai na Boka Samí i a rekohé entre otro 1.465 bòter di serbes, ku a pisa 293 kilo i ku a bai pa banko di glas pa resiklahe.
Mas aleu a rekohé 300 bleki di aluminio, bon pa 4 kilo, ku tambe a bai pa resiklá; i 24 kilo di tur sorto di bòter i otro artefaktonan di plèstik, ku a bai pa resiklá. Finalmente a keda un 34 kilo di shushi komun ku si a bai pa landfill. E total ku e grupo a rekohé tabata di 355 kilo. Te ainda no por kaba di komprondé dikon nos hendenan mes ta sushando e lugá aki dje manera aki.
