Ya ta kumpli 8 aña di eksistensia di Fundashon Tur Ta Konta. Un fundashon ku a lanta riba inisiativa di Etienne Ys i ku despues di 8 aña sigur por bisa ku e tin derechi di eksistensia. Fundashon Tur ta Konta a yuda un kantidat di hóben entre grupo 6 i 8 ku Rekenen i Wiskunde òf tambe Matemátika i Aritmétika den e 8 añanan ku a pasa.

Etienne Ys ta presidente i Nohraya Godfried ta kordinadó di proyekto i nan a konta di e 8 aña di eksistensia i kiko por spera di nan. Sr. Ys  a konta ku tur kos a kuminsá ora e tabata yuda su yunan ku rekenen i wiskunde na kas. Esei ta algu masha importante pe. E ta haña ku mucha den desaroyo mester por dominá diferente idioma bon i tambe kontamentu. I p’esei e tabata riba su yunan i nan tabata skor masha bon punto ku e guia na kas ku e tabata duna nan. Miéntras e tabata ripará ku amigu i amiganan no tabata kue asina bon skor na skol i el a haña su yunan privilegiá. Nan ta yega kas i e mama i tata tur dos tin sierto nivel di edukashon i ta yuda e muchanan ku rekenen i wiskunde na kas. Pero tin hopi mucha no tin e kos ei i p’esei el a bin riba e idea pa e fundashon. Tin hopi hende ta kana rònt eifó ku konosementu di rekenen i wiskunde i kisas no tin yu na kas pa yuda i nan por dediká un tiki tempu ku nan tin liber pa yuda muchanan. El a kana plama e idea serka algun hende i 2 hende sigur a bisé mesora pa start e programa. Asina nan tres a lanta Fundashon Tur ta Konta ku ya tin 8 aña di eksistensia.

8 Aña di eksistensia

Sr. Ys a bisa Djasabra ku nan ta super kontentu ku e resultado te ku awor. Hopi mucha a pasa den e fundashon. Ku eksepshon di último dos aña ku e pandemia a pone ku mester a slou poko, kaminda hopi tutor a wanta, promé tabatin un promedio di 150 tutor tur aña. I mester tene kuenta ku nan yuda gruponan 6, 7 i 8 di skol di fundeshi i kada aña ta bin mas òf ménos 50 aserka. Den 8 aña kada bes a bin 50 mucha aserka pa yuda miéntras esnan ku a kuminsá den grupo 6 ta sigui pasa pa e otro gruponan i ketu bai bou di guia te ora nan kaba ku grupo 8.

Hopi problema ku rekenen i wiskunde

E problema di rekenen i wiskunde serka hóbennan ta grandi. E fundashon ta traha ku 15 skol. E skolnan ta apuntá e muchanan ku mester di èkstra yudansa i nan tarea ta di buska un tutor òf boluntario, trein esaki pa por yuda e hóben ku e skol a apuntá. No ta asina ku un mayor por yega i hiba e yu e fundashon pasobra nan ta traha ku skol. A base di e kantidat di tutornan ku tin, nan tin 15 skol pero mas tutor haña mas skol por partisipá den e programa. Dia a kuminsá tabata 3 pa 4 skol i a krese te 15 skol. Kisas si no tabata pa e pandemia lo tabatin mas skol aserka. Sr. Ys a bisa ku e echo ku hopi mucha ta faya riba e área ei ta un problema ku mester atendé. Pero meskos ta konta pa idioma. 40% di mucha tin difikultat ku rekenen i wiskunde na skol. E fundashon no por yuda tur mucha pasobra nan ta traha ku boluntario. Tambe tin mucha mester di yudansa di ekspertonan. Tin hóben tin diferente problema di konsentrashon, disleksi, deskalkuli etc., etc. i den nan kaso ta profeshonalnan por yuda e hóbennan ei.

Idioma ta un di e kousanan di e problema

Nos hóbennan banda di e problema di rekenen i wiskunde tambe ti hopi problema ku idioma. Esei tambe ta un di e kousanan ku e hóben ta trompeká ku e rekenen i wiskunde. Sr. Ys a bisa Djasabra ku e buki ku e hóben ta haña ta na ulandes mayoria bia. E kuadro di referensia ta otro pasobra e buki ta papia di trein, sneu, vijver, patu miéntras nos muchanan no ta mira e kos ei. E kuadro di referensia ta otro aki. I komo tal idioma ta un problema i p’esei den e trainingnan ku nan ta duna tutornan esei ta inkluí. Nan tin dos tipo di training i tayer; e tutor nobo ta haña tayer pa e drenta e materia i siña e métodonan nobo di rekenen pasobra mayoria di nos grandinan awe no sa di e sistema di awe. I tambe ta siña e tutor di didáktika di kon por siña  un mucha. I banda di esei e tutornan ku ta den funshon, kada 2 pa 3 luna ta sinta ku nan, ta trese un eksperto pa profundisá riba temanan ku por tin i ku ta molestiá na e momentu ei i un di nan semper ta idioma.

Mester di mas tutor

Fundashon Tur ta Konta aktualmente tin ménos tutor teniendo na kuenta ku ta saliendo awor numa di e pandemia.  Aktualmente nan tin 80 tutor i tòg ta yudansa e 15 skolnan ounke no por a kumpli ku tu e demanda di e skolnan. Ta spera ku awor ku e pandemia ta un tiki bou di kontrol ku por haña mas tutor. Algun dia pasa a tene e promé tayer pa tutornan nobo i 17 a mèldu nan mes. Esaki pa sr Ys ta un bon indikashon ku ta bayendo bek den un bon direkshon pa haña mas tutor. E fundashon mester di mas tutor; mas tutor nan haña mas mucha por haña e yudansa ku rekenen i wiskunde. Nohraya Godfried a bisa ku por apliká semper e páginanan sosial ku ta e parti mas fásil pa hende ku ta biba riba medionan sosial kaba, via facebook Fundashon Tur Ta Konta Instagram tambe meskos i einan semper por manda mensahe pa informashon adishonal, wepsait  turtakonta.com i via di dje ta hasi e parti di registrashon. I por yama na 527-1405 i einan manda WhatsApp òf e-mail tambe por na info@turtakonta.com.

E mayor ku ta sinti ku e yu mester di yudansa por haña informashon serka e fundashon ounke ku ta via di e skolnan ku ta den e programa por apliká. E kabes di skol ta esun ku ta tuma kontakto ku e fundashon pa e hóben por tuma parti.

Kwes den mei

Fundashon Tur ta Konta tabatin un kwes den añanan anterior ku tabata tuma lugá den mart. Esaki ta den kuadro ku mart ta e luna di matemátika. I den luna di mart tin diferente fecha internashonal i nashonal ku ta pone èkstra atenshon na rekenen i wiskunde/matemátika. Na 2020 mester a organisá e kwes tur ta konta pero Kòrsou a kai den lockdown nèt na e momentu ei. Ta un aktividat ku hopi mucha i partisipante i tur den un sala grandi i esei no tabata por. E aña ku a pasa tabata lockdown number 2 i tampoko el a tuma lugá. I e aña aki segun Godfried lo reintrodusí e kwes i lo mester konkretisá ainda kon e tei bira. I den luna di mei ora Efo toets kaba i preshon riba maestronan baha, lo ofresé un kwes den un sistema diferente i ku ta pas ku e tempu ku nos ta bibando. E lo ta un kwes mas aktivo, mas práktiko i mas visual.

E método di siña a kambia

Si ántes un mayor por a sinta ku su yu despues di skol i yud’e ku rekenen i wiskunde, awor esei no ta posibel. Tur kos a kambia pa e forma ku e hóben tin di traha su lèsnan. Sr. Ys a bisa ku e sistema di konta awendia yama realistisch rekenen ta otro. Nos a lanta ku abstract rekenen i ta djis konta sifra bou di otro i yega na un resultado. Awendia e sistema a bira mas “talig”. Si ántes tabata traha 10 sòm i un redactie sòm na final, awe el a bòltu. Mayoria kos ta redactie som. E filosofia i pensamentu su tras ta ku e hóben mester por komprondé dikon e ta hasi e kosnan ei. Por ripará ku e método pa siña tambe a kambia. Hopi mayor, segun nan eksperensia ta reklamá ku e yu ta bin kas ku sòm i e o por yud’é, kaminda e mayor tabata bon den rekenen ántes. Ta den e kuadro ei tambe e fundashon ta organisá tayernan di trabou pa mayornan tambe pa nan tambe por haña un bista kon e hóben ta haña lès i kon e lo tin di trahe.

Hasi e yu konfortabel i kita su miedu pa rekenen i wiskunde

E mayor tin gana di yuda e yu pero kos a kambia

I no solamente pa métodonan nobo segun sr. Ys, ku ta e keho di mayoria mayor ku nan tin gana di yuda nan yu pero no por yud’é òf asta ta brua e yu mas ainda. E tayernan ta dediká tempu tambe na lanta un mucha di tal sistema ku e ta gusta rekenen i wiskunde. I tin diferente manera pa na kas via di weganan, via di pone atenshon na sierto kosnan, ta alsa e interes di e mucha. Ta kosnan simpel ku por hasi. Sr. Ys a menshoná por ehèmpel hinka e mucha den kushina ta lag’é lesa kiko tin riba e paki suku, kuantu gram etc., etc. kore outo i wak kuantu kilometer; den interakshon ku e mucha por lanta su interes i kita su miedu pa rekenen i wiskunde pa ora e yega den klas e no tin problema ku sifra. Ta esei ta e kos pasobra ora e mucha mira sifra e ta spanta. Pero si for di na kas kuminsá siñ’e i den forma di wega, ta kita e miedu i asina trese konfiansa i habri un mucha su wowo pa e komprondé un tiki mas mihó kiko ta sifra. Esaki sin tin nodi di bai siña e mucha rekenen mes, ta akomodá e mucha pa e bira mas konfortabel ora e ta sinta den klas pa hasi rekenen i wiskunde. E sistema aki ta tres dimenshonal; e mucha ta visualisá kiko e ta hasiendo.

Traha ku e yu for di 3 aña 

For di chikitu, sigur for di 3 aña por kuminsá guia un yuda pa e haña konfiansa i kita miedu despues pa rekenen i wiskunde. Sr. Ys ta kere ku for di e edat chikí ei, for di ora e yu ta kuminsá traha ku blòki por ehèmpel por gui’e pa e sera konosí ku sifra. Nohraya a bisa Djasabra ku for di chikí ta siña e mucha e komprondementu nesesario. For di beibi tin ehersisionan ku por hasi. Ta keda na e mayor i esnan ku ta guia ku ta eseinan ta importante pa e mucha.

Presupuesto abou

Pa loke ta e parti finansiero e presidente sr. Ys a splika djasabra ku nan ta super kontentu ku nan spònsernan te ainda. Den e añanan di pandemia e spònsernan a wanta un ratu i nan a sinti e krísis. Pero Fundashon Tur ta Konta ta un organisashon ku ta traha ku un presupuesto chikí; por ehèmpel nan o ti un ofisina di nan mes pero kompania i skolnan ta ofresé lugá pa nan reuní.  Nan gastunan ta abou i tin tiki personal den servisio. Loke ta kosta sèn ta merkadeo, pa buska tutor i nan  mester hasi propaganda. Pero asta den esei nan sa konta ku kooperashon di medionan di komunikashon. E aña aki nan a haña aporte finansiero di Samenwerkende fondsen Caribbean. Ta diferente fondo na Ulanda ta pone nan sèn  disponibel pa proyektonan. MCB semper a yuda nan ku loke nan mester. Ennia i Guardian ta pone sèn i tutor disponibel. Ku esaki sr. Ys a bisa ku nan ta aserka kompanianan pa nan presentá nan mes na e personal di e kompania i kaminda por saka tutor pa yuda e hóbennan. I asina por menshoná kantidat di kompania mas ku ta yuda Fundashon Tur ta Konta. Oranje Fonds tambe segun Nohraya na 2019 a nominá e fundashon pa Appeltje van Oranje. E aña aki  rei Wilem Alexander i reina Maksima ta haña aña kasa i Oranje Fonds a krea un fondo komo regalo pa nan i awe despues di 20 aña nan a skohe Fundashon Tur ta Konta komo un di e 20 organisashonnan ku nan a hasi un kampaña kuné i aki na Kòrsou a laga hasi henter un Mural ku un di e eks alumnonan di e fundashon mes huntu ku su tutor a hasi. Asina tantu sr. Ys komo sra. Godfried a pone énfasis riba e sosten ku nan ta haña di organisashonnan.

Simposio di rekenen organisa na november 2021

Tayer yuda bo yu ku aritmetika den grupo 6, 6 i 7