Homenahe na Bida (2) ta un historia i lèsnan di bida. Yadira Wall ta presentá mañan djadumingu 9 di òktober su di dos buki, den e seri di 6 ku e tin komo meta pa saka. Dos aña pasá den nos programa di Djasabra Yadira a lansa e idea i e deseo pa skibi e buki aki. I el a konta nos lo siguiente;

Homenahe na bida; for di tempran e tabata sa ku e lo a skibi 6 buki. Na 2020 el a publiká su promé buki i e dia el a bisa di lo skibi otro  buki pa e entrevista 60 òf mas hende. Esei Yadira kier  hasi pa su 60 aña. Na desèmber 2020 el a kuminsá ku e entrevistanan i di desèmber te mei 2021. Den e temporada ei el a entrevistá 72 persona di kual el a reflekshoná riba su mes bida, esta un total di 73 persona den e buki. Yadira a bisa ku ora el a yega e kantidat di 60 tabatin mas hende ku e kier a entrevista i p’esei el a sigui i a yega 72 mas e ku ta 73.

Kriterio

Ora el a kuminsá pensa pa entrevista mas ku 60 persona, mesora a bin na su mente ta ken e lo entrevistá. El a pensa riba su famia, su rumannan (12) i e no por a skohe pero mester a hasi tur 11 ruman i na banda algun famia mas. Despues ken mas? El a sigui ku su amistatnan. Yadira tin amistat i konosínan di kasi 50 aña largu i esaki tabata un bon oportunidat pa e duna nan tambe elogio den kuadro di e entrevista. Pero ken mas? Asina el a sigui ku personanan ku a hasi hopi pa pais Kòrsou. El a skibi diferente nòmber i mayoria di esnan ku el a skohe, nan tabata entusiasmá pa e entrevista. Asina Yadira a yega na e 72 personanan den e buki.

Enfasis

Durante di e entrevistanan Yadira a bisa ku tirando un bista riba famia e ta kere den union familiar. Sigur teniendo na kuenta ku bo ta wak rondó di bo mes i ta mira ku tin diferente famia ku kos no ta kana manera mester ta. El a kuminsá pensa ta kiko ta bayendo robes. Den e kuadro ei el a skohe su mes famia i otro famia. Si para ketu den su famia tambe tin kosnan ku mester drecha i otro famia tambe por keda inspirá den e kaso aki pa nan tambe para ketu na e pilarnan familiar importante, pa tin un famia stabil. Un di nan ta rèspèt, amor, bon komunikashon, konfiansa, e parti spiritual; tur ta bayendo atras. E ta kòrda tempu na kas di su mayornan, su mama tabata pone nan tur huntu i tabata resa ku nan. E resamentu ei ta tene e famia bendishoná i uni. I despues di tur e kosnan ei a disparsé. Yadira ta haña e parti ei masha importante pa e generashonnan ku ta bini. Kiko nos tin pa ofresé nan. Ta importante pa sa kon importante e pilarnan familiar ta den nan bida pa nan por sigui despues. E ke pa e parti di famia inspirá otro famia pa ban reflekshoná riba famia. Wak e pilarnan i wak ku ata para stabil ainda, kua a lèn i kua a kai. I pa huntu sinta na mesa i wak kon por dil ku famia pa e generashonnan ku ta na kaminda.

Resaltá

Tirando un bista na tur e 72 entrevistanan, kada un historia ta unu riba su mes. Kada historia tin su balor. Por a mira e lucha, e norma i balor ta bin dilanti, e parti tambe ku mayornan a laga atras pa nan yunan. Por mira eksperensianan, sabiduria, por mira kon personanan ku  kai a lucha i lanta bèk riba pia. Tur eseinan Yadira a disfrutá di tur e entrevistanan ku el a hasi. I tur a bira parti di su bida. El a ripará eksperensia di personanan entrevistá e por rekonosé puntonan ku e tambe a siña afó. Den tur e entrevistanan e parti di amor a bin hopi dilanti. Amor pa otro, amor den famia, e parti di yuda tambe a bin hopi dilanti i un entrevista ku el a  para ketu na dje ta di un amiga di dje ku a bis’é ku edukashon di su yunan a bira su proyekto. Pa Yadira esei tabata masha importante pa a tende esei. E tambe a eduká su yunan, tur ta grandi kaba pero e ta haña ku e tin di trese e parti aki pa e mayornan ku ta bin awor. Nos tur por siña di otro, Dios tin bia ta laga bu pasa den algu pa bo siña di dje òf algu pasa ku otro pa abo siña di e persona. I kosnan ku ta bon mester siña di dje. Otro punto ku el a pone énfasis riba dje ta nos ròlnan. Nos ròl di mama. Nos ròl di tata, tanta, tio subrina, prima. No ta pòrnada nan yama ròl. Ta algu ku nos kada un a haña pa ehekutá den práktika pasobra por mira ku e parti ei tambe ta disparsiendo. Por mira un ta zundra otro, yu ke bati yu, mama ke bati yu; e kosnan a brua poko den otro. E ròlnan a brua kompará ku ántes tabatin e parti di gezag. Antes un tanta ta mira un subrina ta hasi algu robes, e tanta ta bai serka su ruman i hala su atenshon. Awendia e ruman ta tuma e tanta na malu pa no mete den nan bida, siendo ku esei ta e kontrol sosial di ántes. Antes si bo sali riba kaya, asta si bisiña mira algu straño nan ta bisa bo mayor. Nos yunan ta mira kon nos mayornan ta aktua i no aseptá ora un persona bin bisa algu i nan ta sigui den e kaminda robes. I p’esei e ta pone atenshon riba famia; laga nos bai reflekshoná riba famia i wak kiko por skapa ainda. Nos no a kis nos famia, ta haña bo ta haña bu ku bo famia pero bo por skohe si kon bo ta dil ku situashonnan den bo famia, segun Yadira Wall.

Inspirá otro

Yadira ke inspirá e lesadónan. En partikular esnan riba e tema aki pasobra e ke pa e ta e liña kòrá den e buki esta e parti di famia, union, amor, yuda. El a ripará ku hende no ke yuda mas; tur kos a bira sèn. Ta nos ta eduká, ta nos komo personanan adulto ta eduká. Ta nos tin di duna direkshon na e muchanan. Pero si nos mes kita nos man, nos ta laga mundu eduká nos yunan, teniendo kuenta ku e media sosial. Yadira a bisa den e kuadro ei ku tin asina informashon ta bin den direkshon pa e mucha, informashonnan robes, kosnan bunita pero ku ta falsu i e mucha ta bira unu ku ke kompetí. Yadira a bisa ku e parti di sinta kome na mesa a pasa pa historia. Famianan no ta sinta mas na mesa huntu pasobra kada yu ta kue nan tayó pasobra e telefòn ta importante pa nan. I e komunikashon familiar unda el a keda.

Media sosial

Yadira ta kere ku ta bon pa tene kuenta ku e ehèmpelnan ku el a duna ariba. E ta kere ku realmente mundu a kambia i tin teknologianan nobo. Tin di nan masha bon pero no por laga nan influensiá nos bida. Nos mester di laga e parti di media sosial dirigí nos bida i disidí kiko i ki ora nos ta hasi algu. Ta nos tin grep riba nos bida, ta nos ta kapitan riba nos bida. I e mayor mester kòrda ku e ta kapitan den su kas i no laga un mucha manda den bo kas. Mester tòrnu e parti materialista for di otro i tene kuenta ku ni tur kos ta sèn pero mester yuda otro. Yadira ta kere ku ora bo ta duna di kurason bo ta haña bèk. Pasobra tin hende por duna ku su mente i e ta keda pensa ku e lo haña bèk. Pero esun ku duna di su kurason no ta kòrda mes ku el a duna i einan e bendishon ta bin.

Danki i danki

Presentashon di e buki ta mañan djadumingu. Yadira ke yama danki na e grupo Ban pe ku a para 100% su tras den e proseso di e buki, den sentido di e parti di kontrolá i dun'é konseho, dun'é sosten i no a lag’é kai niun momentu. Yadira a menshoná ku tur a yud’é ku hopi amor Rachel de Palm, Shenilva Alberto, Glenda Sluis, Esmeralda Rondei Harreman, Wini Paulo, tur a yud’é ku hopi amor den e promé fase. I e personanan ku a bai i pasa mia kuné ta Rashel de Palm i Shenilva Alberto. Nan a keda kuné te final.  E otro grupo ta e personanan ku el a entrevistá. Nan a habri nan mundu, nan a habri nan kurason, nan a konta Yadira nan historia i tur tabata entusiasmá i positivo. I dor ku e buki mester a sali for di 1e di sèptèmber 2021 ora Yadira a hasi 60 aña, debí na situashonnan e no a sali e momentu ei, e entusiasmo tabata asina grandi ku e persona ku el a entrevistá nan mes ta yama i puntra.

Homenahe na Diana Lebacs

E presentashon ta mañan na edifisio tras di misa di Steenrijk. Te ainda e buki ta optenibel serka Yadira Wall i pronto lo ta den libreria. E dia aki e ta duna homenahe na Diana Lebacs (qepd). E ta e persona ku a kontrolá e buki te na final promé ku el a fayesé. Ta un persona tambe ku Yadira por a entrevistá.