David Clementina; Pa 5 aña kaba 88Rockòrsou no ta bou di Curom mas
Ora nos ta papia di radio difushon, sigur nos tin di papia di e revolushon i kambionan den e sektor aki. I un persona ku a kuminsá na edat basta yòn, a krese i awor e ta na kabes di 88Rockòrsou. Nos tin di papia di David Clementina i e kambionan ku el a eksperensia ku radio, e modernisashon, téknikanan nobo etc. David Clementina a habri portanan di 88Rockòrsou pa nos por a sera konosí ku e kambionan.
Train
David Clementina “no tabatin niun otro manera pasobra tur dos mi mayornan ta traha den radio”, esei tabata loke a kondusí su entrada den e mundu di radio. El a nase i krese den radio, for di tempu di Cartridge, long play, edat hopi hóben e tabata hasi e e trabounan chikí chikí pa Myrna Sint Jago, ku tabata lokutor na Curom. Asina el a siña kiko tin di hasi, te el a kuminsá presentá programa.
Imitá lokutornan grandi
E no a siña pa presentá pero tabata eksperensia. E tabata studia na Merka i e tempu ei 88Rockòrsou a habri. E radio tabata den testing i asina David tabata drenta i kuminsá papia pasobra tòg niun hende tabata tende ainda. El a tèst, imitá lokutornan manera Keke Willems, Arisa, Carlos, Myrna. Ta tur e DJ nan el a imitá te el a yega na e sous pa presentá kantikanan,. Ora el a kaba studia na Merka el a disidí ku e ke traha na radio. Su promé trabou serio na radio tabata komo bendedó pero tòg nunka el a keda leu di ta “on air”. Kada bes ku e tabata haña un chèns, e ta sinta tras di mikrofon den aire na radio. Te un dia el a kuminsá presentá programa mainta na Rockòrsou, te awe nos ta na 15 aña despues.
Hende ke mira bu tambe
Papiando riba e desaroyo den e tempu ku el a kuminsá ku e trabounan chikí chikí, trein tras di mikrofon ku no tabata ‘on air’ ainda, te awe, David a bisa nos di Djasabra ku ta hopi kos a kambia. Teknologia ta kompletamente diferente. E forma di hasi programa a kambia, media sosial a bin aserka, e adishon di video a bin aserka den radio. Esei ta e kambionan di mas grandi. I e kambio di mas grandi ta ku hende ke mira bu i no tende bu so, meskos a bin kambio den e forma di benta,
Músika urbano te kos
Segun David, 88Rockòrsou a kuminsá komo un radio di hóben. Orlando Cuales a funda e radio pa e hóbennan pero e muchanan yòn ei a krese ku e género di muzik. I mas i mas grandi urban muzik a bira na mundu i Kòrsou i nan a keda ku e género ei i ta drei tur kos mei mei di dje. Tambe ta focus riba kansionnan lokal i region den Urban, Hip Hop R&B.
Loke ta hasi nan diferente
I ta netamente esei ta loke ta hasi nan di 88Rockòrsou diferente. Nan ta biba ku tur loke ta biba den e bida urbano. E mes ta biba esei, e ta gusta Hip Hop R &B. E tabata ke a toka e kansionnan di Merka na Kòrsou pero dado momentu e hóbennan di Kòrsou tambe a kuminsá traha nan mes kansionnan den músika urbano meskos Hulanda, Puerto Rico, Santo Domingo, Jamaica, tur tin un ‘field’ masha grandi di e músika. I tur ta kai den loke nan ta ofresé i esei ta hasi Rockòrsou diferente. Nan ta biba músika urbano tur ku tin.
Hende a krese ku e radio
Músika urbano ta hopi grandi na Kòrsou. Den tur e añanan el a mira kon e radio a krese ku oyentenan, El a kuminsá ku 16 aña i awor ku e tin 40, por mira e hendenan di e tempu ei a krese ku e radio i muzik urbano di su parti a sigui krese i e hende ta sigui gust’é miéntras e ta krese. I nan ta sòru pa sigui bin ku loke e hende ke. E kontenido i muzik ta hasi e diferensia.
Sound branding
David Clementina lo tin gana di por a midi nan sintonia. E sa ku tin un forma pero nan no a yega na dje ainda. Investigashon den merkado ta algu kostoso pero no imposibel. E ta kòrda ku un tempu el a kore stazje na Guardian group i mester a hasi un investigashon riba e satisfakshon di e públiko na Kòrsou. I den e investigashon ei tabatin un pida di media i el a hasi investigashon di mas òf ménos 7 mil hende i einan ta promé bia el a midi kuantu hende ta skucha kua emisora. I ta promé bia tambe ku el a mira kon e hende ta skucha radio, kiko tin di tene kuenta kuné. E pida di media ta masha importante. Asina David a sigui konsentrá den krese e radio, bon DJ i e músika na su punto. David a konta nos ku el a brand e radio asina duru ku awendia si puntra un hende kua radio e ta skucha, outomátikamente ta sali 88Rockòrsou. E promé kos ku el a drecha tabata e sound branding ku ta sòru pa e radio posishoná su mes haltu den hende su kabes.
Brasa media sosial
E influensia di media sosial riba radio i enpartikular riba Rockòrsou tambe nos a toka. Segun David e no a eksperensiá komo algu negativo pero el a siña semper ku si bo no por bring’é, ta mihó djòin e. I esei nan a hasi. Nan mester a brasa media sosial, wak e parti positivo i kon e por yuda e emisora pa bai laira. E parti mas nobo na Rockòrsou ta un departamento di media sosial. Ta algu ku hopi hende no por a komprondé i ounke e ta kosta sèn, e ta di sumo importansia. Mester monitòr media sosial i p’esei mester invertí den dje.
Ta great pa siña i mira e efekto positivo
I di skucha pa mira tambe tabata algu un tiki difísil pa David na prinsipio. Mas i mas ta ripará ku hende ta tende loke bo a papia pero no por mir’é bèk. I e tópikonan ku por ehèmpel e ku Maudy ta presentá, papiando di tópikonan i pone esaki online tambe ta masha importante. Antes bo ta papia di un tópiko i despues e ta bai muri. Pero awendia e kontenido ei ta keda i hende por bai bèk i bolbe skuch’é i mir’é. I ora hende ta mira bu outomátikamente bo tin di tene kuenta ku bo aparensia. Ta hopi paña kumprá, David a bisa ku un sonrisa. Hende ke mira kos agradabel riba pantaya i bo mester ta konsiente di dje. I no solamente kon bo mes ta mustra pero tur loke tin rondó di bo. David tiki tiki a siña tur kos di video i kon e ta subi media sosial finalmente. Ta un proseso di enseñansa konstante pa loke ta video pero tabata algu interesante i dushi pa pasa dor di dje. I tur esaki segun David ta great pa siña i alabes pa mira despues e efektonan positivo ku e ta trese kuné.
Programa i laga drei
88Rockòrsou ta konsistí di 4 lokutor. Un di e magianan di hasi radio ta pa hasi mas ku ménos. Esei nan a siña den covid. Ta programa hasiendo komo si fuera e DJ tei. Ta graba propaganda i tur kos i programá esaki. Tin radio por ehèmpel Skyradio na Hulanda no tin DJ mes. I tin bia bo ta tende e radio i kere ku tin DJ presente. Ta kostoso pa tin un DJ konstantemente den un radio. Tur esaki ta parti di e téknikanan moderno den radio difushon. David a bisa ku mester ekonomisá.
Un eksperensia amargo
Ya ta 5 aña ku David Clementina a tuma over 88Rockòrsou kompleto. Tabata un paso hopi grandi. Promé ku esei tabata manera e ta doño pero enrealidat e no tabata doño. Awor si David Clementina ta doño di 88Rockòrsou. El a tuma hopi tempu i e mester a proba su mes pa el a hasié. Pero no por kita di e realidat ku 88Rockòrsou a nase di Curom. Curom a bati bankarota loke na su turno tabatin un influensia negativo di e forma ku hende ta mira 88Rockòrsou. P’esei David ta kere ta importante pa e klara e punto aki i un di nan sigur ta ku e ta doño di e radio. David a bisa tabata un eksperensia no agradabel. Nan tabatin e manera pa por a sigui operá. Semper nan tabata ku Curom pero pa 5 aña e ta bou di Cas Cora Media BV. Enberdat nan tabata den mesun edifisio pero pagando hür. Ora mester a muda nan mester a hasi esaki pa garantisá kontinuashon i pa kumpli ku nan kliente i oyentenan. E ta fèrfelu loke a pasa pero nan a surpas’é i a haña un lugá na dr Maalweg pa por sigui drei. Ounke no por kita ku Curom ta forma parti di nan historia. David a bisa ku ta Curom a lanta 88Rockòrsou i e ta sumamente gradesido pa e añanan na Curom i loke nan a nifiká. David ta sinti ku te ainda hende ta afiliá nan ta Curom. E tabatin su impakto negativo i klientenan tabata preokupá di kiko ta bai pasa. Tin ku a stòp nan propaganda pa mira kon ta sigui pasobra nan no tabata sigur di e kontinuidat. Pero 88Rockorosu a keda den aire i e kompromiso tei ku nan klientenan ketu bai. El enfatisá ku ta henter e tim a keda para fuerte pa sigui traha riba e futuro di 88Rockòrsou. Nan tei pa keda, asina David a enfatisá.
Selebrá 25 aña
I den tapara ta ku e aña aki nan ta kumpli 25 aña di eksistensia. Nan ta kontentu di por selebr’é ku oyentenan. Nan a kuminsá selebrá ku fiesta di Marisco. I tin mas evento planeá pa e aña aki. Lo tin hopi premio, paketenan i algun aktividat mas. Lo selebrá huntu ku kliente i oyentenan.
