WASHINGTON, AP.- Presidente Donald Trump a pidi medidanan migratorio mas rígido i basá riba “méritonan” despues di e atake ku vehíkulo na New York ku a laga ocho morto i 11 herido. Ademas, el a kalifiká e atakante komo un “animal”.
Durante un reunion di gabinete, Trump a komentá ku e shofùr den e atentado a haña residensia mediante e “programa di Loteria di Diversidat di Visa” i a pidi Kongreso pa kuminsá “Inmediatamente” ku asuntunan pa eliminá e programa, ku a benefisiá paisnan ku tasa abou emigrashon pa Merka. “Nos mester ta mas rígido, mas fuerte, ménos polítikamente korekto”, asina Trump a bisa.
Algun ora promé, Trump a bisa ku e programa tabata “un okurensia di Chuck Schumer”, e lider di e bloke demókrata den Senado. Desde kapitolio, senador Schumer a akusá Trump di “politisá” e tragedia.
Segun outoridat, e agresor ta un inmigrante uzbeko. E bosero di Departamento di Seguridat Nashonal, Tyle Houlton, a bisa ku el a drenta Merka legalmente bou di e programa na 2010.
Trump a respaldá proyektonan di lei ku ta limitá inmigrashon legal i adoptá un sistema di privilegio di mérito i kapasitashon riba lasonan familiar riba esun ku ta pidi visa.
Djamars anochi, Trump a bisa den un komunikado ku el a ordená e Departamento di Seguridat Nashonal pa “ahustá nos Programa di revishon Ekstremo”. E polítika di Trump aki ta impliká medidanan di investigashon pa identifiká esnan ku por tin simpatianan ekstremista òf nifiká un riesgo pa seguridat nashonal di Merka.
Durante e kampaña presidensial, Trump a proponé pa prohibí entrada di musulmannan kompletamente. Su proyektonan di impedí entrada di inmigrantenan di vários pais musulman ta wòrdu blòkiá pa kortenan federal.