CARACAS, AP.- Konseho Nashonal Elektoral di Venezuela (CNE) a deskartá djabièrnè ku e elekshonnan presidensial di 22 di aprel por wòrdu realisá di forma konhunto ku elekshon parlamentario i di konsehonan munisipal i legislativonan. Esaki ta loke presidente Nicolás Maduro a sugerí resientemente.
E presidente di CNE, Tibisay Lucena, a afirmá ku e outoridatnan elektoral no ta prepará pa “hasi un elekshon presidensial konhunto ku otro elekshonnan ku ta téknikamente muchu mas kompliká”.
Lucena a bisa na prensa ku CNE ya ta avansando pa realisá elekshon presidensial pa e fecha palabrá i ku lo evaluá e posibilidat di “otro fechanan” pa realisá elekshonnan adelantá di Asamblea Nashonal i di konsehonan legislativo i munisipal.
Despues di un enkuentro ku Lucena, e presidente di Asamblea Nashonal Konstituyente, Delcy Rodriguez, a ekspresá ku e instansia lo reuní pa definí e elekshonnan pendiente pero no a ofresé detayenan.
E enkuentro entre e dos funshonarionan haltu a tuma lugá dos dia despues ku Maduro a proponé e adelanto di elekshon parlamentario i di konsehonan legislativo i munisipal lo plantia ku e konsultanan aki por wòrdu realisá di forma simultáneo ku esnan presidensial.
E gobernante a hasi deklarashon algun ora despues ku e forsa opositor mas grandi di Venezuela a deskartá su partisipashon den e evento.