Ban konservá pa nos yunan tin un bunita mundu mañan

Humphrey Bacilio, tambe konosí komo e úniko “Mr. Solo”, ta un berdadero representashon di pashon. I el a kompartí ku nos di Djasabra di su trayektoria di kantamentu, for di momentu ku el a subi tarima te awe ku e ta presentá e kansion “Ban Konservá. Humphrey ta na Kòrsou aktualmente pa sigur un luna i mei mas pa e promové e kansion Ban Konservá.

Su trayektoria

El a konta nos ku den e temporada ku el a kuminsá traha na St. Elisabeth Gasthuis e tempu ei, el a bai un fiesta na Montaña i einan tabatin e banda The Silhouettes di Suffisant tabata toka. Nan a toka un piesa di Wilson Piskett i el a pidi pa lag’é kanta e piesa ei. E ta kòrda ku e tabatin e mikrofon ya den su man i el a kuminsá kanta. Ora el a kaba di kanta, mènedjer di e banda a bin mesora serka dje i bis’é ku e tin un kantante ku ta bayendo Hulanda bai studia, i tabata ke pa Humphrey tuma su lugá. El a aseptá e reto i ta kòrda ku el a debutá na Roxy ku un shou i e mester a pensa un nòmber pasobra ta esei tabata na moda, ku nòmbernan manera mr  Pitiful mr Dynamite i el a duna su mes e nòmber di Mr. Solo pasobra e ta bin ku kosnan úniko. I el a sigui diferente artista grandi e tempu ei ku tabata duna presentashonnan na televishon i e tambe a hinka den su kabes ku ta asina e lo bai duna su shownan. I esei el a hasi na Teater Roxy i Mr. Solo a nase einan.

Hopi kurashi

Promé ku esei nunka Humphrey a kanta, si no ta den kurá. El a konta nos ku un sonrisa riba su kara, rekordando asina kuantu kurashi e tabatin. E piesa ku sinembargo el a subi kanta pa promé bia na Montaña tabata unu ku e tabata gusta masha hopi mes. I kisas hopi hende lo no kere pero e ta un persona masha tímido i e no sa ta kiko a pasa e dia el ku el a subi i kanta ku yen brio. E paso ei sinembargo a yud’é ku el a krese i sigui bai den e ramo aki. Mr. Solo a duna presentashonnan na Teater Roxy, a Cinelandia i West End tabata kaminda tur djadumingu nan tabata duna shou huntu ku tur otro artista. Tur djadumingu ta fiesta tin na West End

Ku 17 aña riba esenario

Humphrey a subi esenario kanta pa promé bia ku 16/17 aña ke men hopi kurashi mes. Pero di einan e mundu di kantamentu a habri pe. El a keda kanta den bandanan na Kòrsou i na 1969 el a bai sigui studia na Ulanda den ramo di enfermeria. El a bai hasi sikiatria i despues tambe den maneho di kuido. Ultimo añanan el a traha den kasnan di kuido di hende ku entre otro Alzheimer i nan a hasi un proyekto pa kambia e situashon di kaminda drumi 10 hende den un kamber, kada hende den su mes kamber. I mientrastantu el a sigui kanta, tabata bin Kòrsou pa shownan ku regularidat. Na 1988 tabatin un shou na Ulanda ku yama “The Sound Mix Show” i na su trabou nan a keda pidié pa e bai pero e no kier  a hasié i na su trabou nan a duna su nòmber den e shou i el a hañ’é ta bai. I asina na Ulanda tambe el a bira bastante konosí. El a biaha henter Ulanda, el a biaha pa Bèlgika i Alemania i a sigui ekspandé su mes riba e tereno di kantamentu. Den último aki e tabatin un Jazzband pero nan a para kuné temporalmente.

Ban konservá

Ora penshun a dal aden, e tabatin mas tempu pa e sinta i hasi kos ku e gusta segun Mr. Solo a konta Djasabra. E por a wak programanan ku e gusta, i asina a kuminsá skibi mas kansion tambe i asina el a traha e kansion di Ban Konservá ku porsierto tin un mensahe masha poderoso su tras. E meta ta bai riba kon nos ta bibando sin tene kuenta kon esaki ta sosodé. E manera di produsí kos ta afektá nos. Ora wak eis ta kuminsá eis ta smèlt na Antártika. Tin hende ta pensa ku e ta leu for di nos i kisas ta bèrdat pero e awa ku ta bin ora e eis smèlt ta buska su kaminda pa e bai. I estudio a mustra ku nos den Karibe tambe ta kore peliger. Por ehèmpel banda di Bahamas i p’esei nos mester ta konsiente i kuminsá pensa kon ta bai kambia kos i pa tòg laga un mundu bunita pa nos yunan ku ta sigui. Ora Humphrey a sinta lesa, el a konkluí ku e tambe ta biba pa biba i p’esei el a disidí di kuminsá wak e kosnan otro. Meta di e kansion ta pa nos tur ta mas konsiente, buska mas informashon, i pa yuda otronan pa kosnan por kambia. E kansion aki ta un balada na papiamentu i tin un video clip tambe huntu kuné i por mira loke e ta kanta den e video aki. E kansion ta kuminsá ku e kos bunita di balèt i ta mustra kiko ta kambiando.

Tempu inolvidabel

Humphrey no falta mashá pa e kumpli 60 aña  den farándula. Pe e temporada ku mas e ta kòrda i mas bunita ta tempu na Kòrsou, tempu el a kuminsá. Ora nan komo artista papia di e temporada ei e ta haña  kalafriu. E ambiente tabata mas kómodo, tur hende huntu ku otro. Esei semper  a keda den su mente. I e di dos temporada ku hamas e lo lubidá ta na 1988 na Ulanda ora el a bai e shou grandi ku a pone ku asta e mester a baha e kontrakt di su trabou pa e por a kumpli ku e tantísimo kompromisonan di kantamentu ku tabata bin den su direkshon. Tabata un bunita temporada pero hopi pisa. I den e tur e tempu ku el a kanta e kansion ku mas ta toke ta esnan di Ray Charles. Tin un kansion di Ray Charles “a song for you” ku e ta gusta asina tantu ku el a bisa su yunan ku dia e bi for di e mundu aki, ta e piesa ei tin di toka na su entiero. I e promé piesa ku el a graba na Kòrsou na aña 1967 “ask you ma” ta algu ku hamas e lo lubidá. E ta kòrda e tempu ei kon Job di Show di Job a hinka nan den studio di Curom i bisa nan ku nan tin di graba un piesa. E ta kòrda ku ta einan el a sinta improvisá i a grab’e. E piesa aki a bira un hit.

No hisa un piesa benta

E kambionan den farándula ta grandi i pa Mr. Solo un di nan sigur ta mensahe di kansionnan. E desaroyo awendia ta mas profeshonal i si bo ke hasié serio e artista ta haña yudansa pa e biba di dje. Tempu di su tempu e no por a biba di dje. I esei ta e diferensia. Pero piesanan di aña 60 e palabranan semper ta bisa algu i awendia e tin e si pero e no ta sintié masha dirèkt. E ta kere ku ora graba algu, pens’é bon i wak pa e tin un mensahe. Un piesa mester ta un regalo i laga e toka e hende. No toka un piesa i his’é benta pa loko.

Promoviendo

Aktualmente Humphrey Mr. Solo Bacilio ta promoviendo e piesa Ban Konservá. El a bisa ku awor el a kuminsá i tiki tiki e ta bai. E ta bai prensa un pa un i wak kon leu e lo yega pa e piesa bira konosí. E tin mas idea den su kabes ku den futuro e lo presentá. E tin hopi piesa den baul ku e ke saka tiki tiki i laga nan bira konosí.