‘Cijntje ta arogante i ta bagatelisá tur kos’
WILLEMSTAD.- Un biaha mas e arogansia di minister di Desaroyo Ekonómiko Ruisandro Cijntje a demostrá ken realmente e ta. Lider polítiko di MAN-PIN, Giselle Mc William ta bisa ku e minister ta tilda parlamentarionan i polítikonan ku ta hasi politikeria a base di e proposishon ku MAN-PIN a hasi pa logra haña mas entrada pa pais ku introdukshon di un impuesto di entrada (“visitor entrance fee”).
Esaki ta un impuesto fiho ku ta kobra tur turista na momento ku nan drenta pais. E lider polítiko ta referí na deklarashonnan di e minister ku a bisa ku ta pasobra e ta trahando riba introdushon di un impuesto asina otronan ta hasi politikeria i bai prensa pa bisa ku ta nan idea.
E pensamentu pa introdusí un impuesto di entrada, Mc William ta splika a nase for di 2017, esta promé ku Cijntje a pensa di drenta den polítika. Na e momentonan ei Costa Rica a introdusí algu similar i a hiba kòmbersashon pa Kòrsou tambe bini ku algu meskos.
“Na 2019 bou di èks minister Steven Martina (MAN) a kuminsá kana e trayekto pa realisá introdushon di e impuesto fiho pa tur turista ku drenta. Lo a introdusí esaki den e preis di pasashi i laga e organisashon internashonal IATA kobra esaki.”
Pa traha e lei a kosta 7 mil florin, segun Mc William. “Minister Cijntje ku su arogansia ta bagatelisá tur kos, pero e mester sa ku promé ku el a pensa di drenta polítika tabatin otronan ku a duna nan granito i promé ku nan tambe tabatin esnan a kontribuí na e totalidat ku Kòrsou konosé aworakí.”
Segun Mc William MAN-PIN si no ta bai kai na e nivel di e minister i si Cijntje ke introdusí algu asin’aki MAN-PIN lo sostené e inisiativa. “Realidat ta sinembargo ku a bira un kustumber ku Cijntje ta pretendé ku ta e a bini ku tur kos, pero nos ta laga na tur hende pa husga pa nan mes.”
Awor ku a tuma nota ku na Boneiru tambe a introdusí e impuesto di entrada ku éksito tabata e momento oportuno pa MAN-PIN bolbe trese dilanti pa Kòrsou tambe introdusí esaki. “Turismo di Kòrsou for di 2017 ta kresiendo i ta momento pa kapitalisá riba esaki i saka máksimo pa pais for di e kresementu ekonómiko aki.”
E impuesto aki ta remplasá e OB ku ta paga pa hür kamber lo krea segun MAN-PIN un “level playing field” si wak e kantidat enorme di apartamentonan, kasnan i kambernan ku ta hür ku turistanan via di AirBnB, booking.com i otro plataformanan digital ku no ta paga OB.
Segun Mc William na Boneiru a introdusí e impuesto aki na balor di 65 dòler pa persona. “Tabata sképtiko riba e idea, pero despues di 1 aña i mei el a resultá un éksito. Den pasado Boneiru tabata kobra apénas 4 mion na impuesto riba hür di kamber i outo, pero aworakí ta risibí 14 mion florin for di e impuesto di entrada.”
Kòrsou, konforme sifranan di 2023 a risibí 500 mil bishitante ku lo yega entre 650 mil pa 700 mil turista na 2025. Ku introdukshon di e impuesto di entrada basá riba un promedio di 600 mil turista (ekskluyendo esunnan menor di edat) ta nifiká ku Kòrsou lo por tin un entrada di 45 mion dòler ku ta mas o ménos 81 mion florin pa aña. E entrada di 81 mion florin aki ta nifiká ku gobièrnu no mester duna CTB supsidio di 15 pa 20 mion florin pa aña mas i ku CTB lo por oumentá su presupuesto pa invertí den un turismo duradero.
Esaki pues sin ku gobièrnu mester saka 15 pa 20 mion florin pa por kompletá e entrada di OB riba kamber di hotèl ku ta mas o ménos un 15 mion florin pa aña di e manera aki CTB por yega na su presupuesto total di 30 pa 35 mion florin. Pa e motibunan aki MAN-PIN ta di opinion ku Kòrsou mester kuminsá tuma pasonan diferente pa por krea mas entrada pa gobièrnu, sin ku mester pone peso riba nos pueblo.
