Esaki ta di kuater sospechoso
WILLEMSTAD.-Ministerio Publiko pa medio di un informe ofisial ta indiká ku djabièrnè 14 di aprel 2023, e sospechoso di inisial U.L.W. alias Nuto, a keda detené na Repúblika Dominikana. OM di Kòrsou a hasi un petishon di ekstradishon di U.L.W. na outoridatnan di Repúblika Dominikana den kuadro di e investigashon di gran eskala yamá Themis. Un tim di reshèrshi konhunto ku ta konsistí di miembro di RST i di miembro di kuerponan polisial di Kòrsou, St. Maarten i Aruba tin na nan enkargo e investigashon Themis bou di direkshon di Ministerio Públiko Kòrsou i Ministerio Públiko St. Maarten.
Ta sospechá U.L.W. di entre otro partisipashon na e organisashon yamá No Limit Soldier (NLS). Esaki ta un kolaborashon kriminal ku ta responsabel pa diferente likidashon i asesinato ku a ser kometé den Reino Hulandes i tambe na otro paisnan. Tambe ta sospechá e organisashon di tin hopi tempu kaba involukrá den trafikashon internashonal di droga. Un parti di e investigashon Themis ya a keda presentá dilanti hues den Korte di Promé Instansia na Kòrsou i entretantu kuater sospechoso a keda kondená.
Dos di e sospechosonan a bai den apelashon. Luna pasá a sigui ku tratamentu di Themis den korte di apelashon na Kòrsou.
Na e momentu aki tin kuater sospechoso ku ta wòrdu persiguí den Korte di Promé Instansia. Mientrastantu den kuadro di ekstradishon, a ekstraditá e sospechoso C.S.H. ku tabata dos aña será na Reino Uni. Mas detaye den edishon di EXTRA.
