Awe djasabra 29 di yanüari 2022 Anaïs Baromeo, hóben di 26 aña ta lansa su buki A Wife’s Nightmare. Ya kaba el a bende 40 di e bukinan aki i awe e ta presente ofisialmente na pueblo di Kòrsou. Ta trata aki di un novela ku lo bai tin kontinuashon tambe. Anais a konta Djasabra di su plannan, su inspirashon i amor pa skibi i kuantu buki el a skibi kaba pero ku no a publiká den forma di ‘hard copy’. Tur su promé bukinan òf historianan ta skibi riba “wattpad”, kaminda pòrnada bo por lesa buki pero tambe skibi bo bukinan. A Wife’s Nightmare ta bira e promé ku ta publiká den forma di ‘hard copy’.
Anais a konta nos ku su inspirashon a lanta dor di un amiga di dje. Nan tabata bai IFE i e tempu ei nan tabata den biblioteka i e amiga a kont’é di un ‘site’ kaminda por skibi i lesa buki. Anais a bai tira un bista riba e ‘site’ i el a hañ’é masha interesante. Asina el a bin riba e idea ku e tambe por skibi buki. Di nada e kos a lanta serka dje. Despues ku el a kuminsá chikí, e gana a lanta muchu mas.
Famia eskritor
Anais ta bin di un famia tambe eskritornan. Ta trata di Papa Baromeo i Barshe Baromeo. Ta trata di tionan grandi di Anais kendenan tabata eskritor. Su tio Wilfred Baromeo mihó konosí komo Barshe tabata edukadó tambe i a bringa hopi pa papiamentu. I su nòmber ta resaltá den e buki Mosaiko. “Ta un honor pa mi forma parti di nan legado, ounke den promé ora mi a kuminsá mi mente no a kòrda ku e tin tionan grandi ku tambe ta eskritor. Ora mi mama a bisa mi ku no ta di nada e skibimentu a sali, bo tin tionan grandi ku tambe a skibi buki”. Su tionan tabata inspiradónan ku tabata trese kosnan dilanti ku niun hende no tabatin kurashi di puntra. Wilfred Baromeo a gana Chapi di Oro tambe i el a puntra semper ken lo ta e siguiente i inkonsientemente Anais a sigui karga e skibimentu aki bai kuné te e ta lansa su buki. “Sin sa Dios a manda e inspirashon aki pa mi, pa mi por skibi i ku tòg inkonsientemente tòg e legado sigui den mi famia”, asina Anais a bisa.
Esaki tabata mi hòbi
Anais tin 16 buki skibí i ta trata di bukinan fikshon, den e direkshon di supernatural, wòlf i vampiro. Ora el a kuminsá ku e idea pa publiká su mes buki, e no por a pensa ku e lo a yega asina leu. Pasobra tabata un hòbi Anais a kuminsá kuné. Asina el a bai buska tur informashon, tuma kontakto ku hendenan di Hulanda ku tambe a skibi i asina el a bin haña tur informashon. Tambe el a haña un editor di Merka ku a konseh’é mihó e skibi un buki kompletamente nobo en bes di bai hasi tur e trabou ku un di e obranan skibí kaba. Ora Anais a kuminsá ku e buki aki e tabatin otro nòmber. E tabata den un di e tantísimo draftnan ku Anais tin banda di e 16 bukinan ku e tin kaba. E tin míles di draft den su laptop. Pero ora e editor na Merka a bisé skibi un nobo, el a puntra su mes kon e te hasi. El a kuminsá buska den su draftnan i a haña un ku e ta kere tin potensial. Asina tiki tiki el a kuminsá skibi i a bin ku e idea di A Wife’s Nightmare.
Un proseso largu, 3 pa 4 aña
E proseso pa a yega finalmente na e buki A Wife’s Nightmare tabata bastante largu. Manera Anais a konta Djasabra kue proseso tabata basta largu pasobra promé ku esei e mester a skibié, e mester a kaba di skibié i ora e tin e kla e tin di duna e editor pa e wak esaki. E buki a dur’e 3 pa 4 aña pa e finalisá.
Lansamentu
Awe mainta na Bruna di 10 or pa 1 or Anais mes lo tei presente pa lanta A Wife’s Nightmare. Banda ku e ta bende riba Amazone komo ‘hard copy’, tambe e lo bende komo ‘e-book’. Tur hende ku ta interesá pa kumpra un buki, por hasié awe na Bruna, kaminda Anais tei tambe pa firma buki i interkambiá ku esnan ku ke konosé mas di aserka. E historia di e buki aki ta un fikshon. E tin romanse, e tin traishon, e tin e amor toksiko. Tempu el a kuminsá skibié, e idea di kartel i narko tabata bin hopi dilanti i asina e inspirashon a toke pa e direkshon ei. E idea di Wife’s Nightmare a lanta ku bèrdat tin ora tin hende ta kasa ku otro òf frei otro i tin bia e persona ei ta skonde un parti di nan ku e otro no sa. I ora bo haña sa esei, e ta shòk bo ku bo no ta pensa ku e hende ei lo a hasi algu asina. A Wife’s Nightmare ta bai di un pareha Regina Cueva i Lorenzo Cueva ku tin hopi aña kasá i despues Regina ta bin haña sa ku Lorenzo ta un narkotrafikante. E lugá ku tur esaki a tuma lugá ta un imaginashon di Anais. E ta algu fiktisio, loke su mente trese, e vishon ku e tin, esei e ta pone riba papel.
Buki di 245 página
Nos ta papia di un buki di 245 página na ingles. Semper Anais a gusta ingles, semper el a skibi na ingles i e ta muchu mas fásil pe. Pe semper e ingles tabata mas mihó pa e pone riba papel. E papiamentu ta poko difísil pa el a skibi pero di otro banda su tionan grandi si tur a skibi na papiamentu. Lástimamente nan no tei mas pa por a yud’é pa skibi na papiamentu. I ademas skibiendo na ingles, e por bai ku su buki rònt mundu. Su meta ta pa alkansá nivel internashonal ku e buki aki.
Anais komo outor, eskritor ta mira su mes hopi leu aki un par di aña. Den prinsipio el a mir’é komo un hòbi, e kier a publiká buki pero tabata algu pe. Pero e reakshonnan ku el a haña a pone ku e tabata publiká nan riba plataforma ‘online’ pa mas hende por les’é. Tiki tiki e ta konosiendo su mes i e ta kontentu di e sosten ku e ta hañando di yunan di Kòrsou. Aña pasá el a bestèl 40 buki i ya for di aña pasá tur e bukinan a kaba. E ta yama danki na tur e 40 hendenan ku a sostené i tur sobrá ku lo sigui sostené awe 29 di yanüari ora e lansa su buki.
Di dos parti na kaminda
I keda pendiente pa e di dos parti di A Wife’s Nightmare. Segun Anais, e di dos parti di e buki aki ya ta kla. Ora el a bisa su editor kiko ta e próksimo paso, esaki a duna a idea pa e di dos parti di e historia aki. I asta e editor a papia di e di tres parti. Esaki ta su meta, esta pa saka mas buki i ta spera ku e lo logra su soño ku ta skibi mas buki.
Gastunan
Skibimentu i publiká bukinan di e forma aki tin basta gastu kuné. Na kuminsamentu ora Anais a haña tur informashon di kuantu lo sali pa e publiká e buki, el a kuminsá spar. Den su kaminda pa buska preis, el a topa ku algun hende ku a hasi erornan i esaki a pone ku e mester a saka mas sèn ku loke el a spera. Na final el a haña bon tòg ku e kosnan a kana bon. Tur e sènnan ku el a invertí den e buki a sali for di dje mes. Anais ta traha den kuido i asina e tabata warda tur su sèn pa por kubri su gastunan. I e gastunan ta haltu pero sin fiansa ni donashon Anais a logra. El a buska finansiamentu den prinsipio pero sin logra. I ounke e no a haña e yudansa finansiero, e no a entregá pero a sigui pusha i e mes a kubri tur kos. Anais ta konvensí ku e buki aki lo ta un éksito!
Bandera di Kòrsou
Anais ta orguyoso di ta yu di Kòrsou i komo tal el a pone bandera di su isla Kòrsou den e buki, na e promé página pa tur hende, internashonalmente por sa di unda e ta bin. Anais lo tin gana ku un dia e por asta para na skolnan i ta un inspirashon pa nos hóbennan.
Laga un komentario