Gerard: Silvania a skùif e kaso riba Pisas
WILLEMSTAD.- Te ainda e 2 trahadónan di Technische Higiënishe Zaken (THZ) no a risibí karta di parti minister di GMN pa nan por regresá trabou. “Esaki miéntras ku e rapòrt di HRO (rekursonan humano) ta kla 2 luna kaba indikando ku e trahadónan no a hasi algu robes, parlamentario pa partido Nashonal, Elvin Gerard ta deklará pa EXTRA.
HRO den su rapòrt a bisa ku e medida ku a tuma pa duna e funshonarionan aki prohibishon di entrada tabata desproporshonal. Máksimo sanshon ku por a duna e funshonarionan tabata un atvertensia pasobra nan tin un relashon ku otro, pero por lo demas esaki ta algu ku por solushoná ku palabrashonnan di trabou.
Segun Gerard ta for di ora ku ku minister suplente di GMN, Javier Silvania a ripará ku el a pèrdè e kaso kontra e 2 funshonarionan el a skùif esaki den man di promé minister Gilmar ‘Pik’ Pisas ku tambe ta minister suplente di GMN. Silvania a presentá ku e kaso di e 2 funshonarionan den reunion di Konseho di Minister pa tuma desishon riba dje, pero den e reunion a indiká na e minister ku ta su responsabilidat ministerial pa atendé ku e funshonarionan.
“Ora di kana parti sèn si minister Silvania sa bon pa hasi e kosnan su so sin envolví otronan, pero awor ku ta trata di un disputa ku el a pèrdè e ta skùif e asuntu riba otronan”, Gerard ta indiká. ‘Miéntras ku tabatin problema ku inundashon na Bándabou ku konsekuensia ku tin problema ku sangura ku por transmití malesa, THZ ku ta e servisio indiká pa atendé ku e tipo di kasonan aki ta keda sin un hefe.”
Gerard ta bisa ku e no ta mira motibu pa e tipo di aktuashon infantil aki i ta di opinion ku mester pidi e funshonarionan despensa i pone nan bèk na trabou.
ABVO
Siman pasá ABVO a guia e 2 funshonarionan konforme un karta ku e sindikato a manda anteriormente poniendo un ultimatem di 2 mei. Pa e fecha aki e funshonarionan mester tabatin klaridat ku nan por ta bèk na trabou.
Den kaso ku no tin klaridat ABVO dia 3 mei lo a kompaña nan pa nan regresá nan boka di trabou. Miembro di direktiva di ABVO, Edson Ignecia den deklarashon pa EXTRA ta bisa ku direktiva di ABVO a pidi su persona siman pasá pa enkargá su mes ku guia di e 2 funshonarionan dia 3 mei.
Ignecia despues di a pidi kopia di e karta ku ABVO a manda pa gobièrnu a tuma kontakto ku Sekretario General di Ministerio di GMN, Sharlon Melfor. “Melfor a indiká ku e karta di ABVO tabata dirigí na Ministerio di Finansa i pa no presentá ku e trahadónan na Ministerio di GMN na Colon.”
Ignecia ta bisa ku el a tuma kontakto ku Ministerio di Finansa kaminda el a haña di komprondé ku a pasa e kaso pa promé minister Pisas. Despues di a tuma kontakto ku Pisas e miembro di direktiva di ABVO a komprondé ku e hefe di THZ mester akudí na ofisina di ARBO pa un proseso di “healing” miéntras ku e otro funshonario maskulino por skohe entre algun otro ministerio kaminda e por bai traha.
“ABVO a pidi promé minister Pisas pa pone tur loke el a indiká den ‘app’ den un karta formal i manda esaki pa ABVO pa asina e sindikato por sigui atendé e kaso aki na bienestar di su miembronan, Ignecia ta deklará.
