Bai ku kuidou spesialmente den trafiko
WILLEMSTAD.-Curaçao Medical Center ta hasi un apelashon serio na hinter komunidat pa sea mas kouteloso den e dianan aki. Drentando wikènt CMC su salanan di emergensia, Kuido Intensivo i Kuido Intensivo Neonatal (NICU) tur ta yen. Tin un fluho grandi di pashèntnan drentando departamentu di Emergensia i CMC ta na su punto máksimo ku no por atendé muchu mas pashènt den e departamentunan menshoná. CMC ta pidi pa bai seif riba kareteranan i spesialmente durante e wikènt di festividatnan aki. Por fabor tuma kontakto ku bo dòkter di kas promé dado kaso ku bo tin un keho médiko. Esaki lo yuda hòspital pa duna mas atenshon na e pashèntnan ku ta rekerí asistensia di hòspital.