WILLEMSTAD.- Segun Alex Rosia, èks-lider di partido PAIS, ta importante pa duna pueblo di Kòrsou mas informashon tokante e efektonan di kambio di klima. “Si bo no sa presis kiko ta e impakto di e konsekuensianan di kambio di klima pa Kòrsou, bo no ta hopi dispuesto pa kambio bo aktitut. Pero si bo sa kon grave e efektonan di kambio di nos klima por ta pa nos, mi ta konvensí ku hopi hende ta dispuesto pa kontribuí na un kambio di nos aktitut.” Asina Alex Rosaria, èks minister di Desaroyo Ekonomiko i èks-sekretario di estado di Finansa di Kòrsou, ta splika. Siman pasá Rosaria a duna di konosé ku Global Americans, ku ta un ‘think tank’ na Merka ta introdusí un ‘High Level Caribbean Climate Working Group’ ku tin komo meta pa kolektá informashon tokante e efektonan di kambio di klima den Karibe. Ku esaki Global Americans ke ofresé gobièrnunan den Karibe rekomendashonnan spesífiko pa kombatí kambio di klima. Rosaria ta forma parti di e grupo prestigioso. Ku ta inkluí mas ku 25 persona for di diferente pais, manera Merka, Trinidad & Tobago, Guyana, Barbados, Colombia i Jamaica. Rosaria ta e úniko representante di parti Karibense di Reino Hulandes.
Segun Rosaria den e próksimo lunanan e grupo lo presentá informashon, konklushon i rekomendashon.
Den un entrevista ku EXTRA Rosaria ta splika ku e ta hopi honra. Na mesun momento e ta enfatisá ku el a keda aserká dor di Global Americans komo konsultant internashonal. Rosaria ta splika ku e tópiko di kambio di klima ta algu hopi grandi ku tin impakto grandi riba islanan di Karibe. ‘Pa motibu di esaki ta importante pa duna informashon na mas hende posibel.’ E grupo di investigashon internashonal lo hasi investigashon tokante diferente aspekto di kambio di klima. Tambe den e próksimo lunanan lo disidí kon por informá pueblo mas mihó posibel tokante e tópiko. Rosaria ta enfatisá ku Karibe ta un di e regionnan ku lo sinti hopi di e efektonan di kambio di klima.
