WILLEMSTAD – Alrededor di 2or di mardugá outo a alkansá un siklista gravemente pa despues kore bai for di sitio. Sentral di polis a risibí un notifikashon ku na altura di e negoshi Marshe di Pruga riba Winston Churchillweg ku e krusada Borinquenweg outo a alkansá un hòmber di edat riba baiskel. Na yegada di outoridatnan i ambulans por a tuma nota ku e víktima tabatin pia i man kibra i un kap grandi na su kabes. Ta algun persona ku a pasa riba e kaminda menshoná a bin topa e hòmber benta riba kaya i a yama polis. A transportá e homber ku urgensia pa CMC pa tratamentu mas avansá. Esaki ta otro kaso di siklista ku ta bira víktima unda e outo ta kore bai asina yama kaso di ‘hit & run’. Algun tempu pasa tabatin dos kaso similar djis tras di otro unda e víktimanan a bin pèrdè nan bida i te awe no a haña esnan ku a okashoná e aksidente. Úniko prueba ku a keda tras den e kaso aki ta rastro nan di e brik i tambe glas ku a kibra na e outo. Polis ta investigando e kaso aki tambe.
