WILLEMSTAD.- Ayera tardi e ‘Siman di Ka’i òrgel 2023’ a keda habrí riba Plasa Brion. Un kantidat di kaha di músika a duna un presentashon kaminda e públiko presente por a subi riba e pista di baile i demostrá nan arte di baile.
Pa e siman aki Ministerio di Enseñansa, Siensia, Kultura i Deporte a publiká un skema di aktividat kuminsando awe djaluna kaminda for di 10 or di mainta pa 2 or di mèrdia lo tin aktividat na Fuik na Otrobanda. Djamars mainta e aktividat lo tuma lugá riba Plasa Wilson ‘Papa’ Godett, dilanti Postkantor na Punda. Djárason mainta lo tin ambiente ku kaha di músika na Sha Capriles Kade i parti mèrdia na Sambil Shopping Center.
Djaweps na Sentro di Bario Marie Pampoen lo tin aktividat di kaha di òrgel for di 11 or di mainta pa 4 or di atardi. Riba mesun djaweps lo tin ambiente musikal di kaha di òrgel na Plasa Rondo i anochi for di 8 or pa 11 or na Klup di Shell.
Djabièrnè for di 10 or di mainta pa 2 or di mèrdia lo tin músika na Plasa Bieu den Punda i djadumingu ta sera e Siman di Ka’i òrgel 2023 durante di un aktividat na Sentro Kultural Kòrsou na Emmastad kaminda lo hasi entrega tambe di sertifikado na kursistanan dor di sr. Alfonso ‘Buchi’ Boekhoudt di Aruba.
Riba potrètnan nos por apresiá algun momentu durante dje apertura.
