Thyrza Girigorie i Roderick gouverneur

Uso di arma di forma ilegal tin hopi atenshon den Hustisia. Mirando su importansia a disidí di hasié un tema pa e ‘samenwerkingsplatform ACOC” Actiecentrum ondermijning Curaçao, esta e plataforma di kooperashon ACOC, kaminda diferente partner den e área aki ta partisipá pa asina por wak un tema den diferente ángulo. O ya den e kuadro aki, dia 6 di novèmber awor  Hustisia ta ranka sali ku un kampaña “Arma ta Karma”.

Di Task Force Vuurwapen pa ACOC

Thyrza Girigorie i Roderick Gouverneur, tur dos di  ministerio di hustisia a para un ratu ketu na e plataforma, kiko nan ta hasi i tambe pa nos papia riba e kampaña di Arma ta Karma. Thyrza Girigorie a splika Djasabra ku ACOC a kuminsá for di 2018 bou di e nòmber di Task Force vuurwapens. E motibu ta ku tabatin hopi insidente ku arma i tabatin e Hato Shooting i e partnernan den hustisia a bin ku un atendementu integral pa ku arma. I a base di esei a lanta e Task Force. Den e Task Force tabatin diferente partner ta sinta huntu, atendé e problemátika i bin ku un aserkamentu. Mas tempu ta pasa mas tema ta bin aserka, pasobra no ta arma so mester di e atenshon. A bin aserka gruponan di kriminal ku tur e problemátika ku esaki ta trese kuné, e fenómeno di trafikashon di hende i vários otro tema mas. I segun tempu a pasa, e Task Force a kambia di nòmber i a bira Actiecentrum Ondermijning Curaçao. Den dje tin 4 tema ku ta arma, trafikashon di hende, labamentu di plaka i e parti di Ondermijning den e sektor di outo ku ta akapará entre otro hòrtamentu di outo, labamentu di plaka den e sektor aki.

Konsientisá i duna informashon

For di despues di lantamentu di e Taskforce te awor ku el a bira ACOC ta promé bia ku ta bin ku un kampaña kontra di arma di kandela. Thyrza a bisa ku nan enfoke si ta pa konsientisá i duna informashon riba tur e temanan ku ta kai bou di ACOC. Manera tin e tema di minamentu (ondermijing). Esaki ta krímennan ku ta debilitá nos komunidat manera korupshon, labamentu di plaka i ta hasi nos komunidat mas suak. Riba e punto aki tambe próksimamente tei kuminsá un otro kampaña. Mas aleu nan ta duna informashon tambe di e atendementu gubernamental ya ku hopi bia ta wak hustisia komo e solushon pero tin hopi otro manera pa solushoná un problemátika ku ta pafó di hustisia. Hopi bia ora yega na hustisia ya ta lat. Por bin un medida si, pero kisas un otro medida ta mas efektivo manera den e parti di trafikashon di hende e persona ta haña kastigu pero kisas e snèk ku el a trafiká e hende den dje, ta keda drei normal. I pa esei tambe tin di tuma medida por ehèmpel sera e snèk i esei ta kai bou di MEO ku tin e posibilidat den kuadro di lei pa hasi. Asina ta wak e otro ministerionan kiko nan por hasi pa solushoná e problemátika i kita e enfoke riba e parti di hustisia so. E otro ministerionan kisas tin solushonnan ku asta ta mas efektivo segun Thyrza.

Diferente instansia den ACOC

ACOC ta abarká diferente instansia riba e tereno hudisial. Entre otro tin polis, warda kosta, duana, defensie, RST, OM, Ministerio di hustisia, Kmar, esaki ta djis pa menshoná algun. Pa kada tema ta aserká esun konserní. Por ehèmpel pa e parti di outo ta invitá kompanianan di seguro i partnernan priva ku tin informashonnan interesante pa nan tin un bista mas general i nan por atendé di forma mas efektivo.

E siman ku ta bin ta drenta skolnan

Roderick Gouverneur a pone atenshon spesífiko riba e kampaña. Arma ta Karma ta bai kuminsá djárason awor dia 6 di novèmber. ACOC a keda lanta promé pa atendé ku e problemátika di arma i p’esei e kampaña tambe. E ta un konsientisashon di komunidat pa uso i poseshon di arma. Den prensa por lesa kada bes kuantu atrako armá tin, tiramentu i tambe hende heridá aksidentalmente. E punto sentral semper ta arma i p’esei mester konsientisá e hende riba poseshon i uso di arma. Hende hopi bia ta bisa ku arma ta drenta di un kaminda. Pero tambe ta un kaminda mester kuminsá i den kampaña ta konsentrá riba e hóben. Mester konsientisá e hóbennan.  Si kuminsá for di e mucha, siñ’é na skol, e ta bai kas kuné pa konsientisá mayornan tambe. Arma ta kousa tristesa den famia ora tin arma den kas. Lo ranka sali na Maris Stella VSBO. I despues lo sigui pa otro skolnan.

Ms JD i Zaidi i videoclip di Dongo

Loke por spera di e kampaña ku ta drenta skol segun Roderick ta ku mester papia ku e hóbennan na un lenguahe ku nan ta komprondé. No por bin ku kosnan muchu di lei i hustisia i p’esei mester laga nan komprondé. I p’esei a buska algun ‘influencer’ den komunidat  ku ta Ms JD i Zaidi i hopi hóben ta interesá den nan i ta sigui nan. Tambe lo tin un video clip ku Dongo ku tambe ta konosí i ta hala atenshon. Asina tin atenshon di e hóbennan. Si yega manera un mener di skol ku ta papia, i mustra ku su stòki, e no ta haña  atenshon di e hóben. Roderick ta masha realístiko ku kisas lo no influensia tur hende den e kampaña pero si por logra maske ta un hóben ku tabatin algu den su mente i no ta hasié mas danki na e informashon ta hasi e kampaña eksitoso.

Arma ilegal

E informashonnan segun Roderick ta riba arma engeneral i tambe spesífikamente e arma ilegal. Tabatin kampañanan den pasado di entrega di arma pero riba e punto aki Roderick a splika ku si bo tin un arma i bo entregá, no ta asina ku outomátikamente bo ta keda eksonerá pasobra djis imaginá ku e arma a keda usá den un atrako òf algu fatal i ta esun ku ta entrega e arma ta esun ku ta responsabel pe. I p’esei a konsentrá riba e konsientisashon esta si bo tin un arma den bo man, promé bo hasi algu kuné, pensa i hala atras.

Esaki mester ta un “wake up call”

E nòmber di arma di Karma Roderick a splika ku nan tabatin un grupo den hustisia ku a bin ku algun idea. E nòmber a bin dor di un video clip ku a sirkulá algun aña pasá ku 5 hóben ku tabata kore den outo ku arma. Nan a realisá ku kasi niun di e muchanan ku tabata den e outo ei, no ta na bida mas. Ke men esaki mester ta e “wake up call” di kiko arma por kondusí na dje. I nan ta kuminsá na skol ku e kampaña ki ta e kos di mas grandi. I banda di esei ta purba post mas tantu riba retnan sosial i traha ku partnernan den kadena hudisial. Thyrza a bisa na desèmber lo evaluá pa wak kon e kampaña a bai, kiko el a logra pa mira si ta sigui òf ku ta bai kooperá ku otro kampañanan. Ta kuminsá na skolnan promé i despues ta wak den futuro kon ta bai sigui. Thyrza a bisa ku e tema mester keda unu di konsientisashon. Durante di 6 siman lo bishitá e skolnan. A plania kua klas i kua edat ta konsentrá riba dje. Tambe nan tin hendenan ku lo konta nan historia despues di a pasa den problema ku arma tambe. I e hóbennan tin chèns di hasi pregunta i papia mas ku e hendenan aki. Ta kuminsá na e skolnan sekundario. Promé kier a kuminsá ku hóbennan di 16 aña pero tin skol ke edatnan mas abou pa duna mas konsientisashon. Tambe n ta konsiente ku ora kuminsá lo tin mas i mas skol ku lo aserka i p’esei a base di e reakshon lo por alargá e kampaña. I si tin hende ku tambe ke konta nan historia tambe por aserka e tim di ACOC. E kampaña tin hopi tempu den preparashon i awor a yega e punto.