Wever-Croes ta refutá informashon tendensioso
ORANJESTAD.-‘Nos gobièrnu ta un gobièrnu serio y nos ta atendé e tema aki, refinansiamentu di debe i RAft ku seriedat. Y tempu lo mustra y duna nos rason”. Di e forma aki premier di Aruba Evelyn Wever-Croes a reakshoná pa EXTRA despues di tuma nota ku ‘Dossier Koninkrijksrelaties’ a publiká ku Aruba por bien peña saka ku nan lo risibi yudansa den forma di plaka pa refinansiá e debe di fondonan ku Aruba a risibi di Hulanda durante temporada di Covid.
Den un informe Dossier Koninkrijksrelaties ta indiká ku Aruba lo no por konta ku refinansiamentu di nan debe si nan no bai di akuerdo ku e lei di konsenso riba supervishon finansiero RAft. Nan ta indiká ku for di un komunikashon di sekretario di estado Alexandra van Huffelen na Tweede Kamer nan ta dedusí ku Aruba por bien peña saka ku nan ta haña refinansiamentu. E proyekto di lei ta na e parlamentonan for di 9 di febrüari 2022 i te ainda no a haña kontesta. Aparentemente Tweede Kamer lo ta pèrdiendo pasenshi.
Den kontakto ku premier di Aruba el a deklará na EXTRA ku pa hopi tempu kaba gobièrnu di Aruba no ta hasi kaso di loke e plataforma Dossier Koninkrijksrelaties ta publiká. E motibu ku e plataforma no ta papia bèrdat pa loke ta Aruba. Sra. Wever-Croes ta enfatisá ku e gobièrnu di Aruba ta unu serio i ta atendé e tema enkuestion ku seriedat.
Riba e pregunta di EXTRA kon ta pará ku e lei di konsenso riba supervishon finansiero RAft, premier Wever-Croes a bisa ku Parlamento desde aña pasá a hasi pregunta riba e RAft i a indiká di no ta sostené e lei manera e ta. Parlamento te ku awe no a haña kontesta riba nan preguntanan. Mientrastantu gobièrnu di Aruba ta trahando riba e posibilidatnan di refinansiamentu, pa despues presentá na Parlamento.
E promé minister arubano ta konvensí ku nan lo keda kla promé ku oktober di e aña aki, esei ta e momentu ku e debenan ta madurá tambe.
