Na kas di hende si ta buska fiskal pa konfiská kachó ku morde hende
WILLEMSTAD.-Un bia mas masha hopi bestia masakra. Un situashon horibel i hopi tristu pa mira kon atrobe kachónan ku ta kana los a drenta kura di hende i mata gran kantidat di animal. Den e kaso aki tabata na Rancho De Herberg. Apénas dos siman pasá tabata den mesun área, na La Hacienda Oliva ku tambe kachónan ku ta kana los a logra penetrá den e kura i mata masha hopi animal. Niun instansia no ta hasi nada, polis no por aktua, asilo di bestia no ta haña supsidio i no por funshoná i asina nos por sigui menshoná.
Último simannan den Otrobanda habitantenan ta man na kabes pasobra tin kachónan ku ta kana los ta morde hende. E kachónan ei ta morde peaton ku ta kana den Otrobanda anto polis ta buska yudansa serka Stanley Ignacio. Tin un lei ku ta bisa ku na Kòrsou niun bestia no mag kana los riba kaya, pero niun instansia no por hasi nada kontra di e problema di kachónan ku ta kana los i kousa destrukshon grandi. Ironia grandi ta sinembargo ku den kualke bario na Kòrsou, kaminda kachónan ta den nan kurá anto si pa kualke deskuido un kachó morde un hende, mesora polis i tur instansia ta yega na e kas ei kompañá pa outoridatnan haltu di hustisia anto ta disidí e momentu ei ku ta konfiská e kachó ku pa deskuido a morde hende. E kachó ei si ta bai kuné i pone drumi.
Den kombersashon ku Stanley Ignacio el a konta kon nan a keda ku awa na wowo pa mira kuantu animal e kachónan a masakrá. Tin karné ku nan a kria na bòter despues ku e mama a muri, pues ta un karné manera un yu. E kachónan a mata un galiña Gueni, úniko na Kòrsou. Mas ku 15 pouwis a muri i tambe mas ku 20 kalakuna a muri. Aparte di e doló emoshonal, e ta un sla ekonómiko fuerte tambe.
Stanley Ignacio ta bisa un bia mas ku e úniko solushon ta pa fangu e kachónan ku ta kana los. Tin un lei ta bisa niun bestia por kana los riba kaya. E mesun lei ta duna 4 dia pa e doño bai reklamá su bestia, den kaso ku a fangu esaki riba kaya. Esnan bon ta buska un kas pa nan i e otronan ku no ta bon ta pone nan drumi. E loke algun ulandes oropeo ta hasiendo, di basha kuminda riba kaya ta fomentá mas problema. E akshon aki ta yama mas kachó mientrastantu no ta atendé ku e problema mes. Niun minister no ta hasi nada pa hopi aña, ni esnan di pasado ni esnan aktual anto mientrastantu e problema ta sigui krese. Banda bou ta yora hopi tempu i meskos ta e kaso ku Banda Riba. Manera indiká den Otrobanda kachónan los ta morde hende i ketu bai esnan responsabel no ta hasi nada.
