Elodie Heloise ta konta

Aventuranan di Kompa Nanzi ta kuentanan ku ya ta eksistí pa vários aña. Despues di un investigashon a bin konstatá ku te ainda den e mundu moderno, e kuentanan di Nanzi tin mesun impakto riba mucha. Dor di e reakshon positivo i relevansia di e kuentanan, Elodie Heloise, eskritor i poeta, a adaptá i pone e kuentanan den un bachi nobo huntu ku su tim. E aña eskolar binidero, e bukinan “Aventuranan di Kompa Nanzi” lo keda distribuí na e seis islanan den reino: Aruba, Boneiru, Kòrsou, Saba, Sint Eustatius i Sint Maarten. Alabes, nan lo wòrdu introdusí tambe na Hulanda.

Aventuranan di Kompa Nanzi

E kuentanan den e buki ta basá riba kuentanan oral ku Nilda Jesurun Pinto a publiká na 1952. Direktor Hans Sleurink a produsí un serie di animashon i dibuho di Toon van Ham. Elodie Heloise ta konta ku a usa e mesun imágennan di ántes pa e animashon di e kuentanan. Abase di esaki a krea material di enseñansa pa yuda alumnonan pensa i papia tokante norma, balor i nan kompas moral. E material di enseñansa ta disponibel den dos opshon: tin dos lès pa kada kuenta. E promé lès ta enfoká prinsipalmente riba kontenido di e kuenta. Kada lès ta kuminsá ku un introdukshon kòrtiku promé ku lesa e kuenta na bos haltu i e ilustrashonnan ta promové komprendementu di e teksto i nan lo pèrkurá pa e skema amplio di e kuenta ta visibel. E di dos lès ta enfoká riba e tareanan ku ta forma parti di e lès. Despues di wak bèk riba e kuenta, e alumnonan ta traha den grupo riba tareanan relashoná ku karakterístikanan di e personahenan prinsipal. Tin un manual spesial pa e maestro pa tur dos opshon. Kada lès ta inkluí un presentashon di PowerPoint pa por sostené e alumnonan su proseso di siñamentu.

Reprodusí e kuentanan di Nanzi

Elodie ta konta ku Kompa Nanzi ta parti di nos herensia. E ta un figura místiko ku a yega for di Afrika, ora ku e katibunan a yega na nos islanan den barku. E katibunan a yega na e islanan i a plama e kuentanan den famia. Elodie ta sigui bisa ku e kuentanan di Nanzi te ainda tin un sierto importansia paso e ta buta bo pensa. Su aventuranan ku su amiganan ta buta bo pensa riba e manera ku el a trata nan i manera ku e mes tabata wòrdu tratá. E punto di bista ta buta bo pensa: "Kon mi lo atendé e situashon akí?" Ademas, un otro parti di herensia ta kuentanan oral. Kuentanan di Nanzi ta dushi. Ántes e intenshon ta ku bo sinta bou di palu i tende nan ta konta kuenta òf na radio. E meta prinsipal tabata e kòmbersashon despues. Ora bo ta pone kuenta den buki so, bo ta pèrdè e seshon di kòmbersá. Elodie ta bisa ku nan ta yama esaki "desaroyo di un kompas moral".

For di eksposishon pa proyekto edukativo

E proyekto a kuminsá ku un eksposishon na Landhuis Bloemhof na aña 2023. No tabatin asina hopi hende, pero un hende na e eksposishon a hala atenshon riba e dibuhonan. Na 1972, Wereldomroep a trahá un serie di 10 kuenta, kaminda e dibuhonan tabata sirbi pa muestra. Kada kuenta tabata tin 30 dibuho. Un grupo di antiano ku tabata biba na Utrecht, a buska fondo pa por a krea programa. E transmishon a pasa algun biaha na Kòrsou i Hulanda. Durante e eksposishon, Elodie i su tim a konta kiko Nanzi ta nifiká. For di esaki a sali hopi opinion ku e kuentanan aki no ta ideal pa mucha. Abase di e opinionnan, Elodie i su tim a hasi un investigashon pa por prueba ku di bèrdat e kuentanan aki no ta pa mucha. Un kuestionario a evaluá e reakshon di e muchanan: kiko nan a haña di e kuenta, e dibuhonan i kiko nan ta pensa di Nanzi. E investigashon a konkluí ku e muchanan tabata enkantá. Nan a gusta e manera ku e kuenta tabata wòrdu kontá. E kombinashon di kuenta i dibuho a krea un impakto real. Un klas di 30 mucha a keda ketu pa 20 minüt. E diskushon ku e muchanan a inspirá Elodie pa reprodusí e kuentanan di Nanzi. E grupo di atenshon ta muchanan di skol básiko den grupo 7 i 8, i e promé i di dos klas di skol avansá.

Material di enseñansa

Elodie ta bisa ku e buki tin un QR code ku ta duna e dosente diferente lès. Tin 8 kuenta i kada kuenta tin dos lès pa dos nivel: skol di fundeshi i skol avansá. Un total di 16 lès ku bo por deskargá (download). E buki ta solamente aksesibel pa skol, pero e plan ta pa por proveé un kantidat na biblioteka. E ta un proyekto edukativo ku a haña fondo di Letterenfonds. Den mesun aña, Letterenfonds i enseñansa na Hulanda a habri fondo pa tur idioma den reino. Esei ta nifiká ku si bo ta un outor na papiamentu, bo por haña supsidio. Elodie ta bisa ku e fondo tabata na altura ku e organisashon ke hasi mas ku e proyekto, pero no tabatin fondo. Na desèmber, Elodie a risibí un yamada ku ta bisa, "Bo tin e proyekto ainda i bo ta deseá sèn?". Naturalmente, Elodie no a pensa ni dos bia i a kontestá mesora, "Si". Den yanüari a kuminsá ku e proyekto ku yudansa di otro instansianan. Ku un grupo chikí di profeshonalnan manera Richenel Ansano, antropólogo, Philie van Veen i Marjan de Visser Lemstra, eksperto den enseñansa den Karibe. Kada biaha tabata evaluá pa no kambia e karakter di e personahenan, miéntras tabata tradusí. Tradukshon na papiamentu tabata den man di Jeroen Heuvel i Crisen Schorea i tradukshon papiamento tabata den man di Gina Ramsbottom i Ramon Todd Dandare,miéntras ku na ingles e tabata den man di Sheila S. Payne i Jackie Balentine i Nicole Henriquez. Koordinashon di teksto i imágen tabata den man di Hans Sleurink i Elodie Haloise, diseño gráfiko tabata Sabine van Winsen, de Grafische keuken i editorial Jeroen Hoogerwerf – Levendig Uitgever. Levendig Uitgever tabata editor, ku Biblioteka Nashonal. E distribushon tambe ta un otro proseso riba su kurpa. Na Hulanda, Stichting Lezen a yuda distribuí e bukinan via biblioteka, komo ta difísil pa a hasi esaki pa 7000 skol. Caribbean Cargo a yuda den e proseso den Karibe. I e banko amigu, MCB, ku su filialnan lo yuda parti e bukinan na skol riba e diferente islanan. Saba ainda ta pendiente pa e proseso por parti e bukinan na skol.

Balor artístiko i patrimonial

Elodie ta bisa ku no mester a reprodusí e dibuhonan komo ya nan tabata eksistí kaba. E dibuhonan di ántes ta hasi e buki mas balioso. Manera a menshoná anterior, e dibuhonan ta produsí pa Tom van Ham. Elodie ta bisa, i tambe bo por mira, e emoshon den kanta dibuho. Elodie ta kere esaki tabata posibel komo e pintor Tom i Nanzi su bida ta similar. Tom tabata un yu di un mama ku 10 otro yu, i nan tabata wòrdu konsiderá pober den e tempu ei. E grupo di antiano, bou di guia di Hans Sleurink, e direktor di televishon a krea e programa. Loke ta atmirabel ta ku nunka e direktor no a bishitá Kòrsou, pero ku portrèt i informashon a logra krea un programa úniko. “Hopi trabou a wòrdu hasí pa yega na e buki”, Elodie ta bisa. Na sèptèmber 2024 a risibí e buki na Hulandes. A kuminsá ku esaki komo un base i despues a sigui tradusí e buki. E proseso di tradukshon no tabata unu fásil. Papiamentu tin diferente ortografia i kada isla tin nan mesun manera di ekspresá i interpretá e uso di idioma. Elodie ta konta ku tabata un dushi eksperensia pa mira e amor di idioma di kada traduktor.

Trabou ku pashon i un mishon

Elodie mes a produsí diferente buki i a gana premio vários bia. Elodie ta bisa: "Mi ta orguyoso di e proyekto, e sosten di su doño Landhuis Bloemhof i tur ku a aportá den e proyekto”. Tabatin desafionan, kaminda kada bia mester a analisá kiko ta e meta prinsipal di e proyekto. Elodie ta bisa ku e proyekto no ta un wega, e kuentanan ta bin for di tempu di sklabitut. A yega na un momentu ku mester a puntra pèrmit pa por a kontinuá ku e kuentanan pasó e ta importante. E ta sigui bisa ku el a lesa ku na un skol na Hulanda a kuminsá introdusí sklabitut. Ta bon ku ta trese esaki dilanti pero ta nesesario pa mustra tur dos perspektiva. Di e manera akí e persona ku ta lesa por sinti i komprendé e historia mihó.”E no tabata fásil, tabatin barera, pero huntu nos a mira e intenshon. I esaki ta algu bon i bunita pa mira”, Elodie ta bisa.

E kos mas grandi di e buki di Nanzi ta ku e ta di nos. Ta nos herensia i nos mester kuid’é.