NEW YORK, AP.- Un avion di e liña Emirates a aterisá djárason na New York ku desena di pasahero i tripulantenan malu, promé ku esakinan a wòrdu rondoná pa vehíkulonan di reskate i poné den karentena.
E avion a aterisá na Aeropuerto Kennedy di New York kual a sali Dubai ku 520 pasahero na bordo. Inmediatamente esaki a wòrdu rondoná pa ambulans i vehíkulonan polisial i a wòrdu poné den karentena pa wòrdu revisá pa spesialistanan di Sentronan pa Kontròl i Prevenshon di Enfermedat di Merka.
Un pasahero, Erin Sykes, a publiká videonan di e agentenan ku máskara i hanskun ta tuma temperatura di e pashèntnan, promé ku nan por a bandoná e avion.
Pa mas atardi tabatin vershonnan kontradiktorio riba kuantu persona ta malu i no tabatin informashon riba un posibel kousa.
E aerolínea a bisa ku 10 pasahero mester a haña atenshon médiko “komo medida di prekoushon” miéntras CDC a informá ku 100 di 520 persona na bordo di e avion ta wòrdu eksaminá debí na síntomanan manera tosamentu i keintura.
