WILLEMSTAD.- E team B.B. Splash, di Bándabou, a konta ku un eksitoso partisipashon den e kompetensia di Artistic Swimming na Cancún, Mexico. Un delegashon di Splash a kompetí di 19 pa 22 di mart último kontra atletanan di paisnan manera Chile, Canada i Mexico i a logra un bunita prestashon.
B.B. Splash ayera a regresá Kòrsou kargá ku premio, loke sin duda ta indikashon di bon progreso i ku por kompetí riba nivel internashonal. E premionan tabata: 3x oro den Duet Miksto, 4x oro den Solo Junior, 1x oro i 2x plata den Masters solo, komo tambe 1x oro i 1x plata den Master Duet i 2x oro den Junior i Master.
Bon prestashon di parti dje atletanan, ku B.B. Splash su dirigentenan hasiendo máksimo esfuerso pa e deporte por sigui krese aki na Kòrsou. Sin duda un dje pasonan importante den e direkshon ei ta e partisipashon den kompetensianan internashonal.
