WILLEMSTAD.-Awe 14 di yüni ta Dia Internashonal di Donante di Sanger i Banko di Sanger di Kòrsou a gradisí donantenan pa nan aporte. Kòrsou ta traha ku donantenan ku di forma boluntario ta kontribuí ku komunidat i duna sanger liber i grátis.
Na e okashon aki Prof. Ashley Duits komo direktor di e instituto a duna di konosé ku ta selebrá Dia di Donante un bia pa aña, pero e realidat ta ku tur dia ta dia di donante pasobra tin mester di e líkido presioso ei tur dia. E parti mas importante di Banko di Sanger ta e donante. Na Kòrsou ta traha ku un programa úniko den sentido ku aki ta traha ku donante boluntario. Den Karibe i Latino Amérika no tin sufisiente sanger, pues ora un hende mester bai hasi un operashon e hospital ta inform’é ku e mester buska 3 pa 4 hende ku ta dispuesto pa duna sanger na momentu ku esei ta nesesario.
E sistema ei tin su parti di riesgo haltu tambe debí ku no sa si e hende ta kompletamente salu.
Durante di pandemia, donantenan na Kòrsou a kumpli kabalmente anto esei sigur ta algu di aploudí.
Duits a konta kon un beibi tabatin mester di sanger masha spesífiko, un tipo ku no ta topa kuné muchu fásil, den un mainta a kuminsá yama donantenan splikando e situashon i dentro di algun ratu donantenan a presentá i asina a skapa bida di e beibi ei. Pues hopi rèspèt i apresio pa kada hende ku ta duna sanger.
