Servisionan bankario online a keda grátis!
WILLEMSTAD/PHILIPSBURG — E gastunan di transakshon ku e bankonan lokal na Kòrsou ta kobra ta entre esunnan di mas abou den region. Esei ta resultado di un análisis komparativo di e gastunan ku e bankonan na Kòrsou i Sint Maarten a kobra na 2022, realisá pa Centrale Bank van Curaçao en Sint Maarten (CBCS).
Den kuadro di e análisis, a kompará loke e bankonan lokal ta kobra riba transakshon, ku e gastunan korespondiente na diferente pais di region i na Hulanda. E paisnan inkluí den e análisis ta Aruba, Bahamas, Barbados, Belize, Jamaica i Trinidad & Tobago. E investigashon a tuma lugá ku kooperashon di tur 7 banko lokal i 1 union di krédito na Kòrsou. E investigashon akí ta sigui unu anterior di CBCS, titulá ‘Households’ financial affairs in Curaçao 2020’, den kual 81% di e partisipantenan tabata di akuerdo ku mester baha e gastunan di transakshon, loke ta indiká ku nan a konsiderá ku e gastunan ta muchu haltu.
Mirando esaki, CBCS a disidí di investigá te kon leu esei ta e kaso. Desaroyo di gastu bankario entre 2022 i 2019 CBCS a kompará e gastunan kobrá na 2019 ku esunnan vigente na 2022 pa mira si e tarifanan a kambia den e último añanan. E resultadonan ta mustra ku, for di 2019, mayoria di e bankonan a oumentá loke nan ta kobra pa atministrashon, i spesialmente pa e servisionan ku nan ta ofresé na nan filialnan (Figura 1)1 . Sin embargo, e servisionan bankario online a keda grátis. Den algun kaso, a asta baha e komishonnan akí pa asina stimulá pago digital.
